Sist måndag vart Lars Magnussen vart konstituert som adm. direktør for Helse Møre og Romsdal.
Styret i Helse Møre og Romsdal konstituerte Magnussen på sitt første styremøte måndag 21. mars. Lars Magnussen skal stå i stillinga fram til den nye direktøren er på plass i medio juni månad.
Den nykonstituerte direktøren er mellombels tilsett som prosjektleiar i Helse Midt-Norge. Han har siste året hatt ansvar for gjennomgangen av sjukehusprosjektet i Helse Nordmøre og Romsdal.
Magnussen har tidlegare vore tilsett 10 år i Helsebygg der han hadde ansvar for prosjektering og planlegging. I tillegg har han hatt ansvar for eksterne prosjekt i same bedrift, mellom anna hadde han i startfasen ansvaret for bygging av ny barneavdeling ved Ålesund sjukehus. Tidlegare var Lars Magnussen kommunalråd i Trondheim.
Det er etablert ei styringsgruppe som skal leie arbeidet med etablering av det nye helseføretaket i Møre og Romsdal – Magnussen leiar dette arbeidet. - I stillinga som direktør vil eg syte for at fusjonsprosessen går så godt som råd er. Eg vil og legge til rette for at styret i Helse Møre og Romsdal får tilsett ny fast adm. direktør, og at styret er førebudde til å ta ansvar for å drifte det nye helseføretaket, seier Lars Magnussen.