Styret for Helse Møre og Romsdal sender no sju alternative modellar for sjukehusstruktur ut på høyring. Ei supplerande utgreiing og vurdering av modellane vil bli handsama i ekstraordinært styremøte 1. oktober, og vil utgjere resten av høyringsgrunnlaget.
- Styret ønska å gå breitt ut og går derfor vidare med alle dei modellane som administrasjonen la fram. Det kom også kommentarar på at det no er særs viktig å få ei avklaring av dette spørsmålet, seier styreleiar John Harry Kvalshaug. Til 1. oktober får styret seg førelagt ei meir inngåande vurdering av de ulike modellane.
- Til 1. oktober vil vi til dømes greie ut økonomiske konsekvensar for dei ulike alternativa. Vi vil også legge fram eit breiare fagleg grunnlag, seier strategi- og utviklingssjef Espen Remme i Helse Møre og Romsdal.
Høyring med frist 7. november
Når dette er handsama av styret vil Helse Møre og Romsdal opne for høyringssvar på det samla grunnlaget. Høyringsfristen er sett til 7. november. Styret vil handsame høyringssvara i møte 20. november, og administrerande direktør vil legge fram endeleg sak for avgjerd i styremøte 13. desember. Helse Midt-Norge sitt styre handsamar saka 14. desember.
Parallelt med høyringsprosessen vil vi også vurdere risiko- og sårbarheit for dei ulike alternativa, opplyser administrerande direktør Astrid Eidsvik. Desse analysane vil også ligge føre til styrehandsaminga 13. desember.
Vedtaket i styret er likt innstillinga frå administrerande direktør. Les saksframlegget og innstillinga - klikk her