Dialogbaserte møte er retta mot barn og unge der det er uklart kva for tenestenivå som er mest rett for vidare oppfølging.
Metoden legg til rette for systematisk samarbeid mellom kommunale tenester og spesialisthelsetenesta, med mål om ei felles fagleg vurdering når tenestene er usikre på vegen vidare.
Føremål og målsetting
Hovudmålsettinga er å sikre at barn og unge i slike avklaringssituasjonar får rett hjelp – på rett stad – til rett tid, gjennom:
- tverrfagleg vurdering i situasjonar med uklart hjelpebehov
- tydeleg ansvarsfordeling mellom involverte tenester
- styrka samhandling og informasjonsflyt
- forutsigbare og trygge pasientforløp
Dialogbaserte møte blir nytta både tidleg i eit forløp og ved overgang frå spesialisthelsetenesta til kommunen, særleg når det er behov for felles vurdering av vidare tiltak.
Når møtet blir gjennomført i samband med avslutning i spesialisthelsetenesta, skjer dette før ferdigstilling av epikrise. Dette gir involverte tenester høve til å avklare konkrete tiltak, ansvar og oppfølging i samarbeid, og styrkjer kontinuiteten i pasientforløpet.
Organisering og deltaking
Dialogbaserte møte er faste, prioriterte møtepunkt der relevante fagpersonar med beslutningsmyndigheit deltek.
Følgjande tenester er normalt representerte
- Kommunal psykisk helse- og rusteneste for barn og unge
- Helsestasjon- og skulehelseteneste
- Pedagogisk-psykologisk teneste (PPT)
- Oppvekstsektor / skule
- Barnevernsteneste
- Kommuneoverlege/fastlegar
- Psykisk helsevern for barn og unge (BUP)
Ved behov kan ytterlegare faginstansar inkluderast for å sikre fagleg forsvarlege vurderingar.
Samtykke, informasjon og personvern
Drøfting av enkeltsaker i dialogbaserte møte føreset gyldig samtykke frå føresette eller ungdommen sjølv, i tråd med gjeldande regelverk for samtykkekompetanse.
Den som initierer saka har ansvar for å informere om:
- formålet med møtet
- deltakarar
- kva som skal drøftast
- korleis teieplikt og personvern blir ivareteke
- rettar knytt til medverknad og samtykke
Etter møtet skal det gis tilbakemelding om vurderingar og vidare plan, tilpassa mottakar sin språk- og forståingskompetanse.