Når legen har bestemt at du treng ein AV-fistel, vil du først bli undersøkt av ein karkirurg. Det blir også tatt ein ultralydundersøking for å vurdere kva blodårar som eignar seg best. Du blir så innkalla til operasjon.
Før operasjonen
Dei fleste pasientar blir innkalla til ein preoperativ poliklinikk. Her møter du lege, sjukepleiar og fysioterapeut om aktuelt. Førebuingar til operasjonen (for eksempel blodprøver, urinprøver, EKG) blir gjort denne dagen. Du får eigen innkalling i HelsaMi om dette er aktuelt.
For å hindre komplikasjonar etter operasjon er det viktig at du ikkje har pågåande infeksjonar. Ta kontakt ved feber eller infeksjon.
Blodtrykket ditt blir målt ved preoperativ poliklinikk. Dersom blodtrykket er for høgt, over fleire målingar, kan dette krevje at du må til fastlegen din for å utgreiast vidare. Den planlagde operasjonen må då utsetjast til blodtrykket er under kontroll.
Dersom du brukar blodfortynnande medisinar (for eksempel, Plavix, Marevan, Eliquis, Albyl-E) får du beskjed på preoperativ poliklinikk om korleis du skal bruke desse på operasjonsdagen.
Ha reseptfrie smertestillande medikament heime, som Paracetamol og Ibux. Treng du sterkare smertestillande medikament, får du dette på resept eller med heim til dei første dagane.
- Ta med medisinane du har heime om du er i tvil.
Før planlagt operasjon er det lurt å førebu heimen slik du har det trygt og praktisk når du kjem heim.
- Dersom du vil trenge hjelp av kommunal heimesjukepleie eller hjelpemiddel kan du sjølv melde frå til kommunen din slik at dette er planlagt før du blir innlagd.
- Ved behov for oppfølging av kommunal fysioterapeut etter operasjon (for eksempel ved hofte eller knekirurgi), må du sjølv ta kontakt og planlegge dette før operasjonen.
For pasientar som skal leggast inn på sengepost
Det er ikkje vanleg å reise på rehabiliteringsopphald, men nokon vil ha behov for heimesjukepleie eller korttidsopphald ved utskriving. Dette hjelper personalet deg med under opphaldet.
For dagpasientar
Skal du til dagbehandling, må du sjølv avtale behov for heimesjukepleie eller korttidsopphald med kommunen på førehand.
Ålesund sjukehus
Ønsker du å overnatte før operasjon? Du kan sjå pris og bestille rom ved Åse hotell her:Bestill rom ved Åse hotell - Helse Møre og Romsdal
SNR Hjelset
Dersom du ønsker overnatting før operasjon kan du kontakte poliklinikken/inntakskontoret for prioritering og bestilling av overnatting ved pasienthotellet på sjukehuset.
For dagpasientar
Om du treng ekstra observasjon etter operasjonen.
Ålesund sjukehus
Dersom det av medisinske grunnar er behov for at vi følgjer deg tett den første natta, kan du bli flytta til eller få plass på pasienthotellet. I slike tilfelle dekker sjukehuset opphaldet.
Sjukehuset Nordmøre og Romdal
Dersom det av medisinske grunnar er behov for at vi følgjer deg tett den første natta vil du bli innlagt på sengepost.
Operasjonsdagen
Om du ikkje har vore på preoperativ poliklinikk får du snakke med turnuslege, sjukepleiar og kirurg på operasjonsdagen.
Alle skal faste om ein ikkje har fått beskjed om anna. Faste betyr at du ikkje skal ete, drikke, røyke, bruke snus, drops eller tyggegummi frå midnatt dagen før operasjonen. Du kan drikke klare væsker som vatn, svart kaffi, te og saft (ikkje drikk mjølk, juice og liknande) inntil 2 timar før oppmøtetid. Du kan pusse tennene som vanleg, sjølv om du skal faste før operasjon.
For å førebygge infeksjon skal du møte utan ringer, smykker og piercing. Du skal ikkje barbere operasjonsområdet sjølv, då barbering kan gi små sår i huda og dermed auke risikoen for infeksjon. Vi bruker klippar og ikkje høvel.
Du skal møte nydusja, anten dusj kvelden før operasjonen eller operasjonsdagen. Bruk reint, romsleg og ikkje loande tøy etter dusj. Dersom du dusjar kvelden før, skal du også ha reint sengetøy. Møt utan sminke og ikkje ta på parfyme eller bodylotion operasjonsdagen. All kosmetisk neglebehandling, inkludert neglelakk, gellack og støypte neglar, skal fjernast.
- Ved operasjonar i magen eller lyske må du gjere rein navlen.
- Dersom du skal til ortopedisk operasjon, skal du bruke våtserviettar med klorheksidin etter dusj. La væska trekke inn i huda før du kler på deg. Du får utdelt våtserviettane på preoperativ poliklinikk.
- Er operasjonen i handa eller i foten må neglar klippast og reingjerast.
Ver venleg å møte presis. Vi må ha tid til å førebu deg til operasjonen. Vi gjer merksam på at oppmøtetid ikkje er det same som operasjonstidspunkt og det kan bli venting. Ta gjerne med lesestoff, iPad, musikk på øyret m. m.
For oppmøtestad, sjå under Kontakt lengre ned på denne sida.
Uansett om du skal vere dagpasient eller bli innlagt på sengepost, er det lurt å ta med
- Toalettsaker
- Gode, romslege klede
- Sko som sit godt på foten, og som er enkle og ta av og på
Dersom du har fått beskjed om kva for faste medisinar du skal ta operasjonsdagen, følg den beskjeden. Ta med dine faste medisinar til sjukehuset.
Dersom du ikkje har fått beskjed tek du med deg alle medisinar til sjukehuset operasjonsdagen. Du får da vite kva for medisinar du skal ta.
Vær oppmerksam på følgjande medisinar
- Astmamedisinar
Ta dei som vanleg, og ta dei med til sjukehuset. Bruker du dei berre ved behov, skal du likevel ta dei med.
- Diabetesmedisinar
Om du skal faste før operasjonen skal du ikkje ta diabetesmedisin operasjonsdagen. Får du ete kan du ta diabetesmedisin som vanleg. Ta med fast og behovsmedisin til sjukehuset.
- Blodfortynnande /Vektreduserande /Revmatologiske medisinar
Om du ikkje har fått informasjon om korleis du skal forholde deg til disse type medisinane, ta kontakt med sentralbordet, som kan sette deg over til aktuelt fagområde.
Sentralbord Sunnmøre70 10 50 00Sentralbord Nordmøre og Romsdal71 12 00 00
Legg att ringer, smykker og verdisaker heime. Vi tek ikkje ansvar for eigendelar som blir oppbevart i seksjonen.
Før operasjonen vil du få informasjon om kva type bedøving som passar best for deg og inngrepet du skal gjennomføre. Her er ei oversikt over dei ulike formene for bedøving vi brukar, og kva dei inneber for deg som pasient.
Lokalbedøving
Dette er ei bedøving som blir gitt i området der du skal opererast. Du får ei sprøyte som gjer at du ikkje kjenner smerte akkurat der inngrepet skjer. Alle får lokalbedøving, og for nokre mindre operasjonar er dette den einaste bedøvinga som blir brukt. Du er vaken under inngrepet, men området er døyvd og smertefritt.
Narkose
Narkose betyr at du søv djupt under heile operasjonen og ikkje kjenner noko. Du får medisinar som gjer at heile kroppen blir bedøvd, og du vaknar opp når operasjonen er ferdig. Dei fleste føler seg raskt vakne etterpå, og kan ete og drikke nesten med det same.
Nerveblokade
Her får du bedøving som verkar på ein bestemt kroppsdel, til dømes handa eller foten. Dette gjer at du ikkje kjenner smerte i det området under og etter operasjonen. Effekten varer vanlegvis i 12–24 timar. I tillegg kan du få medisinar som gjer deg avslappa.
Spinalbedøving
Denne typen bedøving blir gitt med ei sprøyte i ryggen, og gjer nedre del av kroppen døyvd. Du er vaken, men kjenner ikkje smerte frå området som skal opererast.
