Diagnosen blir stilt ved undersøking hos legen din. Behandlinga som blir vald er avhengig av kvar kjønnsvortene er, kor lenge du har hatt dei og om du er gravid eller ammar.
Det er ingen førebuingar som er nødvendige for å starte medikamentell heimebehandling av kjønnsvorter, anna enn ein legetime og ein resept.
Treng du at legen skal behandle deg på legekontoret må du ha timeavtale for dette. Eventuelt må du ha ei tilvising frå fastlegen din til ein spesialist som utfører behandlinga.
Vanlegvis vil legen byrje den medikamentelle behandlinga med å skrive ut ein resept på eit middel eller ein krem du kan bruke heime:
Podofyllotoksin-middel (Condyline)
Dette er eit middel med cellegift som hemmar celledeling og medfører celledød. I Noreg finst det under namnet Condyline. Podofyllotoksin skal ikkje brukast av gravide og ammande. Er du kvinne i fruktbar alder må du derfor bruke sikker prevensjon med kondom eller unngå vaginalt samleie når du blir behandla med dette middelet. Podofyllotoksin skal ikkje brukast på opne sår etter kirurgisk inngrep og er ikkje godkjent til behandling hos barn under 12 år.
Imiquimod-krem (Aldara)
Dette er ein krem er eit lokalt immunstimulerande middel. Kremen stimulerer immunforsvaret i hudområdet til å få bukt med viruset. Denne kremen er ikkje utprøvd for gravide eller ammande. Sjekk med den behandlande legen din dersom du er usikker om du kan bruke denne kremen.
