Operasjon ved trang halspulsåre

Faste

​Før operasjonen/undersøkinga må du faste. Om du ikkje møter fastande, kan det hende at vi må avlyse/utsette timen.

Dei siste 6 timane før operasjon/undersøking skal du ikkje ete mat eller drikke mjølk/mjølkeprodukt. Dei siste 2 timane skal du unngå drops og tyggegummi, snus og røyk, fordi dette kan auka mageinnhald og magesyre. Fram til 2 timar før kan du drikke klare væsker: Vatn, saft, jus utan fruktkjøtt, brus, te og kaffi utan mjølk. Du kan svelge medisinar med eit lite glas vatn inntil 1 time før. Du kan pusse tenner og skylle munnen når som helst.

• Mat og mjølk/mjølkeprodukt: Blir stoppa 6 timar før
• Klare væsker, drops og tyggegummi, snus og røyk: Blir stoppa 2 timar før

Om du likevel har ete eller drukke utanom dei tidene som står her må personalet få vite det.

Før enkelte inngrep skal du drikke ei viss mengd næringsdrikk. Dersom dette gjeld deg, vil du få beskjed.

Under operasjonen blir pulsåra stengd ovanfor og nedanfor det området som skal opererast og pulsåra opnast på langs. Vanlegvis legg ein inn ein shunt for å sikre blodsirkulasjon til hjernen mens inngrepet pågår. Forkalkingane blir skrelte ut med spesielle instrument. Ein del får sett inn ein patch/bot for at det ikkje skal bli ei innsnevring av opninga. Huda blir lukka med re-absorberbar tråd. 

Operasjonen blir utført i narkose.

• Du blir liggande på intensivavdelinga til dagen etter inngrepet.
• Når du vaknar har du eit urinkateter, og dren frå operasjonssåra. Begge blir vanlegvis fjerna neste dag.
• Du får stå opp av senga dagen etter inngrepet. Det er viktig å halde seg litt i bevegelse etter inngrepet. Dette reduserer faren for blodpropp.
• Blodtrykket blir overvaka nøye dei første dagane. Dette fordi høgt blodtrykk gir auka fare for bløding. Dersom du kjenner at du begynner å få hovudverk må du straks kontakte personalet. Hovudverk kan også oppstå på grunn av auka blodforsyning til hjernen.
• Av og til kan ein oppleve forbigåande talebesvær og håsheit og dessutan problem med å styre tunga. (Dette fordi nerven som styrer desse områda blir drege til sides for å komme til blodkaret).
• Det er vanlegvis lite smerter med dette inngrepet.
• Du kan dusje etter eit par dagar, først med vasstette bandasjar og så utan bandasjar etter 3-4 dagar. Legg alltid tørre og reine bandasjar på operasjonssåra etter at du har dusja.

Heimreise

• Vanlegvis blir du utskriven etter 3-6 dagar.
• Du blir sjukmeld i 1 månad, men kan returnere før dersom du har roleg arbeid.
• Før heimreise går vi gjennom medisinane dine og du vil få beskjed om eventuelle endringar.
• Dei er ingen sting som skal fjernast.

Korleis førebygge Carotisstenose

• Røykestopp betrar spontanforløpet ved åreforkalking og gjer at åra blir mindre utsett for nye forkalkingar, det vil igjen seie at åra held seg lenger open. Røykjestopp er meir effektivt enn medikamentell behandling.
• Spis sunt, og ver fysisk aktiv.
• Bruk eventuelt blodfortynnande og kolesterolsenkande medikament.