Vi tilrår at du alltid nyttar siste versjon av nettlesaren din.
Til deg som skal/har fått innlagt thoraxdren
Thoraxdren
Thoraxdren syg ut luft (pneumothorax), blod (hematothorax), væske (pleuraeffusjon) eller puss (empyem) frå pleurahulen/lungesekken.
Store luft –og/eller væskesamlingar i pleurahulen kan gi store pustevanskar og i somme tilfelle kan innlegging av thoraxdren vere livreddande.
Punktert lunge (Pneumothorax)
Pneumothorax kan oppstå spontant av seg sjølv, det kan bli påført gjennom prosedyrar/undersøkingar (ved for eksempel bronkoskopi, innlegging av pacemaker og veneport) eller det kan oppstå ved slag/traume mot brystkassa (fall frå stor høgd, bilulykke eller liknande).
Ein liten pneumohorax/luftlekkasje vil kroppen klare å ordne sjølv – ein vil då følge med på utviklinga med hjelp av røntgen av lungene dagleg fram til ein ser ein ønskeleg trend. Ein større luftlekkasje vil trenge drenasje med hjelp av eit thoraxdren.
Blod i lungesekken (Hematothorax)
Hematothorax ser ein gjerne når brystkassa har vorte utsett for slag/traume og brekte ribbebein gir bløding i vevet/strukturane rundt brotet. Også her vil mengda av blod vere avgjerande for om ein treng å legge inn dren eller ikkje, og om blødinga er aktiv eller ikkje.
Pleuraeffusjon
Pleuraeffusjon oppstår når det samlar seg væske i mellomrommet mellom lunga og brystveggen. Det kjem ofte av ein underliggande sjukdom (for eksempel infeksjon/lungebetennelse, ulike krefttypar og hjartesvikt). Også her vil mengda på væska avgjere om ein treng å legge inn dren eller ikkje, og om ein har smerter og/eller opplever kortpustheit.
Puss i brysthinna (Empyem)
Empyem er betennelse i brysthinna med puss i pleurahulen. Pleurahulen er rommet som blir danna mellom dei to laga av brysthinne (ytre hinne av lunga og indre hinne av brystveggen). Dei fleste tilfella av pleuraempyem oppstår som ein komplikasjon til lungebetennelse, men andre årsaker kan vere operasjon eller skader i brysthòla. Ein vil vurdere å legge inn thoraxdren om ein ser at det trengst drenasje av tjuktflytande puss, og dessutan behov for innsetjing av oppløysande stoff (Actilyse) dersom pussoppsamlinga har blitt til ein fast masse.
Før innlegging av thoraxdren
Det blir tatt blodprøver, og eit røntgen av brystkassa. Vi vurderer behov for CT av brystkassa og EKG.
Vi følger med på blodtrykket ditt, pulsen og pusten, og passar på at du får nok oksygen. Du vil få tilført ekstra oksygen opp i nasen om behov.
Du vil elles bli klargjord av sjukepleiar etter gjeldande rutinar på avdelinga.
Av og til må ein skal faste. Ikkje drikk eller spis mat før du har fått tydeleg beskjed av ansvarleg sjukepleiar eller lege.
Under sjølve innlegging av drenet
Du får lokalbedøving og smertestillande i tablettform før og etter innlegginga. Smertene er individuelle og situasjonsavhengige, og vi justerer smertelindringa etter korleis du som pasient opplever situasjonen. God kommunikasjon begge vegar er viktig!
Tjukna og plasseringa av drenet variere etter kva ein skal drenere.
Etter innlegginga av drenet ta vi røntgenbilete av brystkassa for å sikre at drenet ligg rett.
Du skal som regel tilbake på sengepost etter at røntgenbiletet er teke.
Etter innlegging av drenet
Drenet blir kopla til ein kassett (ein plastboks) der ein kan følgje med korleis drenet fungerer.
Sjukepleiar vil passe på og lese av kassetten til thoraxdrenet med jamlege mellomrom, og sjekke bandasjen.
Dersom røntgenbiletet av brystkassa ser bra ut, og ein er fornøgd med plasseringa av drenet, kan det koplast på sug (undertrykk). Suget er festa i veggen bak hovudenden på senga og det vil vere ein lang slange mellom suget og kassetten til thoraxdrenet.
Smerter
Det viktig med god smertelindring slik at du får puste med djupe pust og du får evna til å hoste ved behov. Du kan få ei hostepute til å halde imot brystkassa for smertelindring ved behov.
Bevegelse og aktivitet
Det er viktig med mobilisering for å førebygge komplikasjonar som blodpropp og lungebetennelse. Det er ingen restriksjonar!
Dersom du har sug festa i kassetten til thoraxdrenet og ønsker å gå ut i korridoren eller lenger – gjer avtale med sjukepleiar og/eller lege. Som regel kan du i korte periodar vere fråkopla suget/veggen. Hugs å gi beskjed når du er tilbake på rommet slik at sjukepleiar får kopla på igjen suget.
Be om ein rullator til å henge kassetten til thoraxdrenet på ved mobilisering.
Thoraxdrenet m/kassett må ikkje veltast, og slangen mellom deg og kassetten til thoraxdrenet må ikkje bli knekk på og/eller koplast i frå kvarandre. Dersom eit uhell skulle skje – gi beskjed til sjukepleiar straks.
Thoraxdrenet m/kassett skal henge under brystnivå – dette får å få fallhøgde og sikre god drenering.
Bandasje
Det er viktig at bandasjen rundt innstikkstaden er tett for å forhindre luftlekkasje, og er tørr for å forhindre infeksjon. Gi beskjed til sjukepleiar dersom du observerer at det trengst eit skift.
Vidare forløp
Det vil bli tatt røntgen av brystkassa fleire gonger under forløpet.
Dagleg legevisitt der du får oppdatering og får vite kva som skal skje vidare.
Ved fjerning av thoraxdrenet
Under fjerninga av drenet skal du ligge på sida og puste godt inn og halde pusten til legen seier at drenet er fjerna og du kan puste igjen.
Det skal takast nytt røntgenbilete av brystkassa etter 2 timar. Dette for å kontrollere at der ikkje er tilkommen luft under fjerninga av drenet.
Dersom røntgenbiletet er bra – kan du skrivast ut. Av og til er det andre grunnar til at du skal vere på sjukehuset lenger.
Det blir lagt på kvit vaselin (unngå luftlekkasje) og steril bandasje. Du kan dusje utan bandasje etter 3-4 dagar. Skift bandasjen dersom han blir våt.
Eventuelle suturar skal fjernast hos eigen lege etter 10-12 dagar.
Poliklinisk kontroll med røntgen av brystkassa blir avtalt ved utskriving.
Eventuelle reseptar og sjukmelding blir skriven ut ved utskriving.
Dersom du blir utskriven med thoraxdren til heimen (ved pneumothorax)
I enkelte tilfelle der ein ser at eit thoraxdren ikkje kan fjernast då luftlekkasjen ikkje vil avsluttast, kan du etter gitte kriterium bli utskriven med thoraxdren tilkopla eit såkalla Heimlich-ventil. Det er ein einvegs-ventil, liten og berbar.
Det kan leke noko væske i frå ventilen. Det kan derfor vere lurt å ha på ein pose/hanske og teipe fast på sluttstykket. Hugs å klipp eit hol slik at luft slepper ut. Det kan også vere lurt å legge i eit stykke med papir/kompress som syg til seg væska. Posen/hansken blir skifta ved behov.
Innstikkstaden må dekkast til med kvit vaselin inst (forhindre luftlekkasje) og steril dusjebandasje utanpå. Blir skifta på ved behov og alltid etter dusj.
Ver merksam
Førehandsreglar som må takast når du har hatt pneumothorax:
Ved spontan pneumothorax: Det er IKKJE tilrådd å drive med dykking med trykkluft – gjeld livet ut.
Du kan ikkje ta fly dei første vekene vekene etter avslutta drenbehandling for pneumothorax. Talet på veker er individuelt, avhengig av flyseselskap. Ein må derfor undersøke reglane hos kvart enkelt flyselskap før ein flyg den første tida etter gått gjennom pneumothorax.
Ta kontakt med lege dersom:
Du får aukande/ny-oppstått pustevanskar.
Dersom du får feber >38,5 grader og han ikkje kan knytast til annan sjukdom.
Såra v/innstikkstaden blir tiltakande raudt og hovent.
Besøksparkering i parkeringshuset Passasjen, med innkøyring ved habiliteringsbygget og ved den nye hovudinngangen til sjukehuset. Det er også besøksparkering mellom kreftavdelinga og barne- og ungdomsavdelinga.
Parkeringa blir registrert automatisk med skiltgjenkjenning.
Appen EasyPark er også eit godt betalingalternativ. Du kan aktivere kameraparkering i appen for automatisk trekk.
HC-parkering
HC-parkering finn du i første etasje på parkeringshuset, med innkøyring ved hovudinngangen til sjukehuset. I tillegg er det HC-parkering ute ved habiliteringbygget, hovudinngangen, barne- og ungdomsavdelinga, kreftavdelinga, vaksenpsykiatrisk poliklinikk / barne- og ungdomspsykiatrisk poliklinikk (BUP), UPA og ved administrasjonsbygget.
Oversikt over sjukehusområdet
Markeringar på bildet: Grøn markering viser parkering for pasientar/besøkande. Mørk blå markering viser HC-parkering.
Kart
For å finne fram på sjukehuset kan du bruke karttenesta Mazemap. Tenesta gir detaljert vegskildring til avdelingar, kafear, toalett og andre stader på sjukehuset. Du kan også bruke kartet heimafrå for å førebu deg til oppmøte.
Fram Ekspress og alle andre bussar går innom busslomma ved Ålesund sjukehus. Unntak: Flybussen i Ålesund stoppar berre ved busslomme oppe ved hovudvegen.
Fly
Ålesund lufthavn, Vigra ligg om lag 23 km frå Ålesund sjukehus.
Praktisk informasjon
Barn og unge blir påverka når nokon i familen blir sjuke. Dei treng å forstå kva som skjer. Vi på sjukehuset skal bidra til at barn og ungdom blir tatt godt vare på i slike situasjonar.
Treng du nokon å snakke med? Prestetenesta er tilgjengeleg for å lytte til deg, om du berre vil slå av ein prat eller dele ting du tenker på.
Prestetenesta si viktigaste oppgåve er samtalar med pasientar og pårørande. Dei tilbyr også undervising, rettleiing, og samtalegrupper, både for pasientar og tilsette.
Presten og diakonen er her for alle, og kan formidle kontakt med andre trussamfunn, religionar eller livssynsorganisasjonar.
Du finn oss i hovudvestibylen. Ta kontakt med oss om du treng vegskildring til avdelinga du skal besøke, om du har behov for å betale poliklinikk-timen din kontant, hjelp til å bestille drosje, eller andre serviceoppgåver.
Apoteket ligg på nordsida av sjukehuset, like ved hovudinngangen.
Kafé
Vi har god heimelaga mat, varme og kalde rettar, til gode prisar.
Du finn oss i 1. etasje, fløy M. Velkomen!
Opningstider:
Måndag til fredag: kl 09.00 - 15.00
Helg og høgtid: stengt
Kiosk
I tillegg har vi kiosk i hovedvestibylen ved sjukehuset.
Opningstider:
Måndag til fredag: kl 07.00 - 20.00
Laurdag og søndag: 12.00 - 18.00
Raude dagar: 10.00 - 18.00
Mange pasientar og pårørande ønsker å ta bilde eller video som eit minne frå tida på sjukehuset. Det kan du gjere så lenge det er deg sjølv, pårørande eller vener som blir avbilda.
Det ikkje er lov å ta bilde av medpasientar eller tilsette uten løyve.
Vi håper alle viser respekt for personvernet under besøket ved sjukehuset.
