Finansiering av forsking i Helse Møre og Romsdal 2024

Alle midlar i ramma øyremerkte til forsking i HMR blir fordelte frå Helse Midt-Noreg HF. Med unntak av den resultatbaserte finansieringa blir eventuelle restmidlar tilbakeførte ved årsskiftet. Forbruket i figur 1 inkluderer tilsette og drift ved Seksjon for forsking og innovasjon og Seksjon for kliniske studiar (Klinisk forskingspost), samt internt finansierte ph.d.-stipendiatar og mellombelse forskarstillingar, amanuensisstillingar ved NTNU, fleirårige prosjektmidlar og såkornmidlar fordelte etter utlysing.

Eit langsiktig satsingsområde for forsking er å bygge forskingskultur og -grupper. I 2024 blei det offisielt etablert ei ny forskingsgruppe i føretaket – AI in Medical Imaging (AIMI), som leiast av forskar og medisinsk fysikar Endre Grøvik. Vi har no tre forskingsgrupper i HMR HF, kor Forskingsgruppa for OCD og angstlidingar, leia av forskar og psykolog Kristen Hagen, og den ortopediske forskingsgruppa Orto-Forsk, leia av forskar og ortoped Tommy Frøseth Aae, blei oppretta i 2023. Forskingsgruppeleiarane innehar 50% stillingar og har årlege driftsmidlar til bruk i noverande fase. Vi finansierar òg interne ph.d.-stipend, kor vi jamt over støttar 10 samtidige stipendiatar (5 årsverk) gjennom si doktorgradsutdanning (fig 2).

Ei kjerneoppgåve er forskingsfinansiering, kor SFI både kontinuerleg og årleg lyser ut interne forskingsmidlar for tilsette som startar med forskingsarbeid og for etablerte forskarar. SFI legg også til rette for å søkje eksterne forskingsmidlar ved at tilsette kan søke om «frikjøp av tid» frå klinikk til søknadsskriving m.m. Etter konkurranseutsett intern utlysing blei det meste av dei resultatbaserte midla tildelt seks 2-årige forskingsprosjekt og 22 mindre såkornsøknadar (figur 3). I figur 1 kan ein sjå at det er noko restmidlar att etter forbruk av den resultatbaserte finansieringa. Mindreforbruk her skuldast overføring av tildelte midlar til 2025 etter opphald eller forskyving i dei ulike forskingsaktivitetane. I tillegg fekk vi 2,1 mil. kr. i tilskot ved årsskiftet til å dekke utgifter ved den nye Universitetsbiblioteksavtalen, noko som frigjorde tilsvarande sum for forsking. 

Sidan 2021 har vi òg lyst ut midlertidige konkurranseutsette forskarstillingar i storleik 20-40% (i inntil 3 år). I 2024 var 19 personar tilsett i slike midlertidige forskarstillingar, samt 4 i fyrsteamanuensisstillingar ved NTNU (tilsvarande 7 årsverk).  I haust hadde vi rekordhøge søkjartal ved utlysing av forskarstillingar, så engasjementet for å drive forsking internt i HMR er der! Ekstra gledeleg er det at vi no har representasjon frå ytterlegare ein helseprofesjon – klinisk ernæringsfysiologi (Kirsti Kverndokk Bjerkan), og ei retning – helsetenesteforsking (Anne Strand Alfredsen Larsen) blant dei med - forskarstillingar. I tilsettingsprosessen har vi òg hatt fokus på at forskarane bør søkje eksterne forskingsmidlar i løpet av tilsettingsperioden. Klinikar-forskarane med slik avsett tid bidreg mellom anna med kring 50% av dei årleg publiserte artiklane frå føretaket, som genererer resultatbaserte øyremerka midlar til forsking som i tur brukas til utlysing av nye interne midlar. I alt 80% av dei er involvert i gjennomføringa av ei eller fleire kliniske behandlingsstudiar (fig 4). 

Tilbake til Årsmelding 2024: Forsking, innovasjon, utdanning og kompetanse