Simuleringsareal for læring og kompetansebygging i HMR

VirtSim har i 2025 fått på plass fysiske simuleringsareal ved alle sjukehus i føretaket. Med etablerte simuleringsareal ved Sykehuset Nordmøre og Romsdal (SNR), Kløvertun i Volda og Kunnskapssenteret i 6. etasje i Ålesund, er det lagt til rette for eit samla og likeverdig tilbod innan simulering, ferdigheitstrening og kompetanseutvikling for alle tilsette.

Dette er VirtSim

Utviklinga av simuleringsareala er bygd på eit langvarig arbeid i regi av VirtSim – ei tverrgåande arbeidsgruppe som sidan 2015 har arbeidd på tvers av seksjonar og klinikkar ved alle sjukehusa i HMR. Arbeidet har hatt som mål å byggje både kultur og infrastruktur som legg til rette for bruk av simulering og ferdigheitstrening, og å løfte simulering som pedagogisk metode i arbeidet med pasienttryggleik og kompetansebygging. Gjennom tidleg og aktiv involvering av fagmiljø og tilsette har tilbodet vore behovsstyrt frå starten av, og forankra i reelle kliniske behov.
Simuleringsareala er bygde opp etter same prinsipp og deler  felles utstyrspark. Dette gir eit likt og gjenkjenneleg tilbod ved alle sjukehusa, uavhengig av stad. Tilsette kan delta i simulering og opplæring på tvers av lokasjonar, med same metodikk, utstyr og læringsmål, noko som styrkjer samarbeid og kompetansedeling i heile føretaket.

Gode rammer for læring

Ved SNR er simuleringslokala innreidde som realistiske pasientrom, med sjukehusseng, medisinske uttak og relevant utstyr. På grunn av pågåande utfordringar knytt til nettverksløysingar har areala førebels ikkje vore tekne i full bruk, men utforminga  legg til rette for praktisk og systematisk trening på situasjonar som ein møter i klinisk kvardag, både individuelt og i tverrfaglege team. Slik trening bidreg til auka tryggleik, betre samhandling og styrkt handlingskompetanse hos dei tilsette.

Ved intensivseksjonen ved SNR er det i tillegg etablert eit eige simuleringsareal som er utstyrt som eit fullverdig intensivrom. Her er det plassert avanserte simulatorar for teknisk ferdigheitstrening på høgt nivå, retta både mot behandling av vaksne pasientar og nyfødde. Arealet gir høve til realistisk øving på komplekse og krevjande situasjonar, der presis teknisk utføring, kommunikasjon og samhandling er avgjerande. Simuleringsarealet ved intensivseksjonen gjer det òg mogleg med digital debrief gjennom bruk av video- og lydopptak frå øvingane.  I tilknyting til simuleringsareala finst det studiesoner med skjerma sitjeplassar. 
Samla sett gir simuleringsareala i Helse Møre og Romsdal eit godt grunnlag for kontinuerleg læring og kompetanseutvikling. Gjennom felles struktur, felles utstyr og systematisk bruk av simulering som læringsmetode, vert fagmiljøa styrkte og grunnlaget for trygg og god pasientbehandling vidareutvikla i heile føretaket.