Forskingsnyheiter
Forskingsgruppeleiar sentral i implementering av ki i bildediagnostikk
Denne veka tok Helse Møre og Romsdal i bruk KI-verktøyet BoneView ved alle røntgenavdelingane. BoneView skal støtte medisinsk personell ved analyser av røntgenbilete ved mistanke om brot, væske i ledd og ledd som er ute av stilling.
Endre Grøvik er medisinsk fysikar og forskingsgruppeleiar for AIMI. Han har saman med Ida Fallmyr Jørgensen vore prosjektleiar for implementeringa av kunstig intelligens i klinisk drift på røntgenavdelingane ved alle sjukehusa.
– Arbeidet saman med Ida har vore utruleg gøy og lærerikt. Vi har utfylt kvarande på ein svært god måte. Ida er ein usedvanleg organisert og strukturert prosjektleiar, og hennar sterke leiareigenskapar har vore essensielle for framdrifta i prosjektet.
Eit sentralt mål med prosjektet er å evaluere nøyaktigheita til KI-verktøyet BoneView i ein klinisk kontekst. Ved å samle inn data knytt til sanne positive, sanne negative, falske positive og falske negative resultat vil prosjektet forstå korleis verktøyet presterer under ulike forhold.
– Dette gir oss ikkje berre innsikt i kor nøyaktig BoneView er, men også i praktiske gevinstar som redusert ventetid for pasientane og færre unødvendige legekonsultasjonar, forklarar Grøvik.
– For enkelte pasientgrupper kan vi forvente at nøyaktigheita nærmar seg 100 %. Dette har allereie blitt observert i andre helseregionar i Noreg. Dersom dette blir stadfesta, kan vi vurdere å la BoneView operere autonomt for visse typar skadar.
Prosjektleiarane er begeistra over moglegheitene KI-verktøy som BoneView bringer med seg, både i dette prosjektet og for framtidige initiativ.
– Det er utruleg spennande å vere i gang med det som vi håpar blir ei omfattande implementering av kommersielle KI-verktøy i helsevesenet. Gjennom dette prosjektet byggjer vi verdifull erfaring og kompetanse som vil støtte andre fagmiljø i Helse Møre og Romsdal som ønskjer å ta i bruk KI-teknologi, avsluttar Grøvik.
Les også: Raskare røntgendiagnostikk med kunstig intelligens
Vil du vite meir om forskingsrelatert aktivitet knytt til Helse Møre og Romsdal? Følg @forsking_hmr på Instagram!