Presenterte masterarbeid om rehabilitering av kritisk sjuke på kongress i Paris
Korleis kan fysioterapi bidra til at kritisk sjuke pasientar gjenvinn rørsle, meistring og kontroll over eigen kropp? Det var tema då spesialfysioterapeut Karianne Grüner Bjåstad ved SNR presenterte masterarbeidet sitt på ein internasjonal konferanse i Paris.
Foto: Privat
Den 26. til 27. september deltok Karianne Grüner Bjåstad på «10th European Congress on Weaning and Rehabilitation in Critically-ill Patients» ved Sorbonne-universitetet i Paris. Konferansen samlar fleire faggrupper som arbeider med behandling og rehabilitering av kritisk sjuke pasientar, mellom anna sjukepleiarar, legar, fysioterapeutar, ergoterapeutar og sosionomar.
For Bjåstad var dette andre gongen ho deltok på konferansen.
– Dette er ein tverrprofesjonell konferanse som eg absolutt kan anbefale. Eg har delteke to gonger i samband med masteroppgåva mi, fortel ho.
Foto: Privat
Fysioterapi ved alvorleg sjukdom
Masteroppgåva hennar handlar om fysioterapi ved «critical illness polyneuropathy» (CIP) og «critical illness myopathy» (CIM). Arbeidet var ein del av den treårige kliniske masteren hennar i nevrologisk fysioterapi ved UiT, som ho tok frå 2022 til 2025.
CIP og CIM er tilstandar som kan gi omfattande muskelsvakheit hos kritisk sjuke pasientar og gjere det vanskelegare å venje pasienten av mekanisk pustestøtte. I masterarbeidet undersøkte Bjåstad kva erfarne fysioterapeutar legg vekt på i førebygging og tidleg rehabilitering av desse pasientane.
Studien byggjer på intervju med fire fysioterapeutar frå fleire sjukehus. Funna peikar mellom anna på betydninga av individuelt tilpassa tiltak, sensorimotorisk stimulering, samhandling med pasienten og tett koordinering i det tverrfaglege teamet.
Presenterte arbeidet for internsjonalt fagmiljø
På konferansen fekk Bjåstad presentere masterarbeidet både gjennom ein vitskapleg poster og ei kort munnleg framlegging.
– På konferansen hadde eg posterpresentasjon og ei kort munnleg presentasjon av oppgåva, seier ho.
Ho var heller ikkje den einaste fysioterapeuten frå Helse Midt-Norge som deltok. I tillegg til Bjåstad var det også ein fysioterapeut frå Sykehuset Levanger og to frå St. Olavs hospital, der Bjåstad tidlegare har arbeidd.
Deltakinga hennar på konferansen var støtta av Fysiofondet, Fond til etter- og vidareutdanning av fysioterapeutar.
Neste utgåve av konferansen blir arrangert i 2028.
Foto: Privat
Vil du vite meir om forskings- og utdanningsrelatert aktivitet knytt til Helse Møre og Romsdal? Følg @forsking_hmr på Instagram.