Vi tilrår at du alltid nyttar siste versjon av nettlesaren din.
TID som felles fagleg rammeverk for komplekse pasientforløp i demensomsorga
TID som felles fagleg rammeverk for komplekse pasientforløp i demensomsorga er eit samhandlingsprosjekt mellom kommunale helse- og omsorgstenester, alderspsykiatri og palliativt team/PSHT i Møre og Romsdal.
Prosjektet vil styrke tverrfagleg samhandling på tvers av nivåa gjennom å etablere TID-modellen som eit felles fagleg og metodisk rammeverk i oppfølginga av personar med demens og åtferdsmessige og psykologiske symptom (APSD).
Beskriving av prosjektet
Prosjektet bygger på fleire års erfaring med implementering av TID-modellen i ni kommunar i Møre og Romsdal, og tek utgangspunkt i dokumenterte effektar for tilsette, brukarar og pårørande.
TID-modellen er eit manualbasert arbeidsverktøy for systematisk kartlegging, tverrfagleg refleksjon og oppfølging ved komplekse pasientforløp i demensomsorga. Prosjektet utforskar korleis modellen kan brukast som eit felles fagleg og metodisk rammeverk i samhandlinga mellom kommune og spesialisthelseteneste.
Målet er å legge til rette for heilskaplege pasientforløp, presise vurderingar og styrka tverrfagleg samarbeid mellom kommune, alderspsykiatri og palliativt team.
Demens er ein av vår tids største helseutfordringar. Opptil 90 prosent av personar med demens utviklar APSD, noko som stiller høge krav til kompetanse, struktur og samhandling i tenestene.
Erfaringar frå ni kommunar i regionen viser at systematisk bruk av TID-modellen gir betre faglege vurderingar, auka meistring og redusert belastning hos tilsette, auka grad av samhandling, og dessutan positiv effekt for brukarar og pårørande.
Prosjektet omfattar samarbeid mellom kommunale helse- og omsorgstenester, alderspsykiatrisk avdeling og palliativt team/PSHT. Partane deltek som likeverdige aktørar i utvikling av felles arbeidsformer og samhandlingsrutinar.
Prosjektet blir gjennomført gjennom:
strukturerte workshops på tvers av tenestenivå
kompetanseutvikling og opplæring i TID-modellen
utvikling av ei felles brukarreise (blueprint) som synleggjer roller, kontaktpunkt og samhandling
felles fagdagar
Workshop blir brukt som arena for innsiktsdeling, analyse, felles omgrepsutvikling og samskaping av løysingar.
Prosjektet er forankra i Fagleg samarbeidsutval for kronisk multisjuke og skrøpelege eldre i Helsefellesskapet Møre og Romsdal, og er i tråd med nasjonale faglege retningslinjer for demens, der TID-modellen er tilrådd ved APSD.
Resultat og erfaringar skal danne grunnlag for vidare implementering av TID som felles fagleg rammeverk i regionen etter prosjektperioden.
