Veka etter påske blir innlagde pasientar og akutte funksjonar flytta til Hjelset

– Vi har førebudd oss godt og har planane klare for å sikre ei trygg og god overflytting av innlagde pasientar til det nye akuttsjukehuset på Hjelset. Vi gjer individuelle vurderingar knytt til kvar enkelt pasient og vel transportmiddel ut frå behovet, seier klinikksjef Britt Rakvåg Roald.

Tidsplanen er klar

Klokka 05.00 den 23. april stenger akuttmottaka i Molde og Kristiansund for mottak av pasientar. Samtidig opnar det nye akuttmottaket på Hjelset. Klokka 08.00 startar flyttinga av pasientar i prioritert rekkefølge frå dei ulike sengepostane og til nye sengeområde ved SNR Hjelset.

Dette er ein omfattande operasjon som involverer transport av pasientar med ambulansar, bårebilar og minibussar, og dessutan koordinering av helsepersonell for å sikre ein trygg og smidig overgang. Det blir sett inn ekstra ambulansar som handterer transporten av innlagde pasientar. Andre ambulansar skal som vanleg ivareta akuttberedskapen i området. Helse Møre og Romsdal vil sørge for god informasjon både til pasientar og pårørande, og dessutan til dei kommunale helsetenestene som blir ramma av flyttinga.

Avvent med sjukehusbesøk

Det vil vere stor pågang på sjukehuset under flyttinga og pårørande blir derfor oppmoda til å vente med besøk til dagen etter flytting, viss dei er komfortabel med dette.

– Det vil vere krevande for tilsette å følge opp besøkande samtidig som flytteprosessen går føre seg. Vi har full forståing for at det kan vere vanskeleg for pårørande å vente med å komme på besøk og i dei tilfella der det er nødvendig, så vil vi legge til rette for besøk, seier Rakvåg Roald.  

Klar oppmoding til kommunane

I tida før 23. april er det svært viktig at kommunane på Nordmøre og i Romsdal sørger for at pasientar som er ferdigbehandla på sjukehus, blir henta ut av sjukehusa og får eit kommunalt tilbod.   

– Vi har hatt dialog med kommunane og fått tilbakemelding frå fleire om at dei har planar for å hente ut dei utskrivingsklare pasientane sine før flyttinga. Det er vi veldig glade for då vi vil unngå å måtte transportere desse pasientane til Hjelset, seier Rakvåg Roald.

Ivaretek behovet for akutthjelp

Alle akutthjelp-funksjonar skal fungere som normalt under flytteprosessen. Frå akuttmottaket opnar kl. 05.00 og til sengeområda opnar kl. 08.00 vil akutt24 vere sengeområdet som blir brukt for akutthjelp-pasientar etter at dei er avklarte i akuttmottaket, med unntak av pasientar med behov for intensivbehandling.

Eigen plan for oppfølging av fødande

I samband med at også føde og barsel flyttar frå Molde sjukehus og til Hjelset den 23. april er det lagt ein plan for alle fødande med termin rundt flyttedato. Telefonnummer til fødeavdelinga som skal brukast fram til 23.april kl. 08.00 er tlf.nr. 71 12 17 60. Frå 23. april kl. 08.00 opnar vi for fødslar på Hjelset og då skal ein bruke tlf. nr. 71 11 63 40.

Ved behov på flyttedagen, vil fødeavdelinga ved Ålesund sjukehus kunne ta imot fødande frå Molde og Nordmøre.

Møteteneste av jordmor

Møteteneste av jordmor vil frå innflyttingsdato ta utgangspunkt i reisetid frå sjukehuset på Hjelset. Møtetenesta gjeld fødande med reiseveg over 90 minutt. Som tidlegare skal dei som har rett til følgeteneste ta kontakt med fødeavdelinga som sørger for at jordmor møter den gravide og følger inn til sjukehuset.

Trafikkmessige forhold 

Det vil vere auka aktivitet rundt sjukehusa og på vegane i området mellom Molde, Hjelset og Kristiansund på flyttedagen. Befolkninga vil sikkert legge merke til fleire ambulansar på vegane enn normalt og vi ber om forståing for eventuelle trafikkforstyrringar dette medfører. Vis gjerne omsyn i trafikken og gi fri veg i dei tilfella ambulansen varslar med blålys.