I SAMOPP-prosjektet blir simulering brukt som verktøy for å forstå og forbetre informasjonsflyten i pasientforløp på tvers av tenestenivå med Helseplattformen. Gjennom realistiske scenario får helsepersonell sjå korleis informasjonen dei legg inn i journalsystemet faktisk blir presentert for andre aktørar.
Illustrasjon: SAMOPP
– Mange opplever at dei ikkje ser korleis eigne meldingar og notat blir presenterte for mottakar, sjølv om vi nyttar same journalsystem. Difor har vi testa simulering som metode for å synleggjere informasjonsflyten gjennom eit heilt pasientforløp – frå heimen og tilbake igjen, forklarer prosjektleiar Katrine Skrede Mortveit.
Den 9. september vart det gjennomført ein stor simulering på Åse Helsehus i Ålesund. Rundt 35 deltakarar frå ulike delar av helsetenesta – frå heimesjukepleie og fastlege til sjukehus og kommunale tenester – følgde den fiktive pasienten «Olga Skrøpeleg» gjennom eit heilskapleg pasientforløp.
– Vi ville sjå korleis informasjon vert journalført, vidareført og utnytta i dei ulike ledda. Det gav oss eit unikt innblikk i korleis systemet fungerer i praksis og på tvers av spesialist- og primærhelsetjenesta, seier Skrede Mortveit.
Foto: Helse Møre og Romsdal
Etter den store simuleringa vart det klart at det var behov for å gå djupare inn i enkelte kritiske punkt. Det vart derfor gjennomført mindre simuleringar med fokus på blant anna innlegging frå heimesjukepleie til akuttmottak, utskriving frå sjukehus til kommunehelsetenesta, og informasjonsflyt for fysio- og ergoterapeutar.
– Desse mini-simuleringane gir rom for djupare drøfting. Vi får diskutert om utfordringane er tekniske, organisatoriske eller handlar om kompetanse og opplæring. Det gir oss eit betre grunnlag for å finne gode løysingar, seier Skrede Mortveit.
Simuleringane har avdekt både styrkar og forbetringsområde i dagens praksis. Ved å samle aktørar frå ulike delar av helsetenesta, har prosjektet fått fram kor komplekst eit pasientforløp kan vere – og kor viktig det er med god samhandling.
– På simulering av heilskapleg forløp kjentes avstanden mellom partane stor, men på minisimuleringane oppdaga vi at vi vil akkurat det same, sa ein deltakar frå heimesjukepleien.
Erfaringane frå simuleringane blir no dokumenterte og delte med relevante aktørar for å styrkje kompetanse og samhandling på tvers av regionen.
