Helseføretak og kommunar einige om tettare samhandling i omstillingsarbeid

I tråd med samarbeidsavtalen skal Helse Møre og Romsdal og kommunane i Møre og Romsdal så tidleg som råd orientere og involvere kvarandre ved planlegging av endringar og tiltak som kan påverke den andre parten. Målet er at innbyggjarane skal få trygge og samanhengande helsetenester, også når tenestene må endrast. Då må partane sjå konsekvensane for heile pasientforløpet og planleggje endringar i fellesskap.

I styresak 75/26, overordna omstilling i Helse Møre og Romsdal, vart utfordringsbilete og omstillingsbehov skildra. Det vart framheva behov for god involvering av relevante samarbeidspartnarar.

Heilskapleg perspektiv i utviklingsarbeid

Kommunane viser i eit saksframlegg 11/26 til ekstraordinært partnarskapsmøte at dei anerkjenner Helse Møre og Romsdal sitt omstillingsbehov og er positive til å ha blitt involvert i prosessar knytt til prehospitale tenester og DPS Nordmøre og Romsdal. Samstundes peiker kommunane på at dei ikkje har blitt involvert i utgreiing av dei andre omstillingstiltaka. Vidare opplev kommunane at dei ofte kjem seint inn i prosessane og difor har avgrensa moglegheit til å påverke både problemforståing og val av tiltak. Spesialisthelsetenesta og kommunehelsetenesta er meir samanvevd enn tidlegare. Dette krev eit heilskapleg perspektiv i utviklingsarbeid og at partane sikrar gjensidig medverknad og involvering.

I ekstraordinært Partnarskapsmøtet 22. september, vart problemstillinga knytt til omstillingsbehov og medverknad drøfta. Helse Møre og Romsdal peika på eit krevjande handlingsrom prega av omfattande omstillingskrav. Samstundes vart det understreka at vellukka omstilling føreset gode rammevilkår, godt prosessarbeid og eit tett samarbeid med kommunane.  

Kommunane viste til behovet for betre styring og finansiering ved oppgåveoverføring frå sjukehus til kommunane. Dersom oppgåveoverføring blir overførte utan tilstrekkelege ressursar, kan det føre til nedskjering av kommunale tilbod, fleire sjukehusinnleggingar og auka press på spesialisthelsetenesta.

Vedtok å styrke involvering og medverknad

Etter å ha informert kvarandre om situasjonsbiletet i Helse Møre og Romsdal og kommunane, drøfta partane problemstillinga knytt til medverknad i fellesskap og kom fram til følgande vedtak i ekstraordinært Partnarskapsmøte.

• Partnarskapsmøtet understrekar behovet og partane sitt ansvar for å styrkje involvering og medverknad i prosessar som kan få stor betydning for den andre part.​
  
  
• Partnarskapsmøtet ber Strategisk samarbeidsutval  å utvikle strategiar for slik gjensidig samhandling og heilskapleg tilnærming for omstillingsprosessar i både Helse Møre og Romsdal og kommunane.​
  
  
• Partnarskapsmøtet ber Strategisk samarbeidsutval gjennomgå dei ulike modellane for finansiering og organisering som Helsereformutvalet vil foreslå, og vurdere kva modellar som vil være mest hensiktsmessige for samhandlinga i Møre og Romsdal.  ​

I tillegg blei det oppmoda om å oversende eit forslag frå Partnarskapsmøtet til Strategisk samarbeidsutval:

• Partnarskapsmøtet ber Strategisk samarbeidsutvala  å initiere eit Forskings- og utviklingsarbeid (FoU) knytt til helseføretaksøkonomi og kommuneøkonomi i samarbeid med KS.​

Møtet blei avslutta med ei felles forståing av dei store utfordringane og omstillingsbehova både i helseføretaket og kommunane. Partane understreka at eit tett og tillitsbasert samarbeid vil vere avgjerande i tida framover.