SamOpp med fagleg innlegg på medisinske fagdagar i Ålesund
Den 15. april deltok SamOpp med det første av tre planlagde faglege innlegg under medisinske fagdagar ved medisinsk avdeling i Ålesund. Innlegget sette søkelys på samhandlingsfunksjonar i felles journal og korleis desse kan brukast betre i samhandlinga mellom kommune og sjukehus.
Eit spørsmål til salen tidleg i presentasjonen – «Leitar du etter informasjon i felles journal?» – illustrerte eit viktig poeng: Berre eit fåtal rakk opp handa. Dette samsvarer med eit hovudfunn frå arbeidet i SamOpp: Kunnskapsnivået om kva samhandlingsfunksjonar som faktisk finnast i felles journal, er lågare enn mange har trudd.
Stor interesse for felles funksjonalitet
I innlegget vart det lagt vekt på å skape felles forståing for arbeidsprosessar i kommune og helseføretak, og på å vise konkrete eksempel på informasjon som allereie er tilgjengeleg i felles journal. Deltakarane fekk mellom anna innføring i funksjonar som:
- oversikt over kommunal bistand via «hjartet»
- informasjon om hjelpemiddel gjennom «hjelpemiddelmannen»
- visning av prosedyrar via avatar
- legemiddelsamstemming og legemiddeladministrasjon
Presentasjonen viste korleis desse funksjonane kan bidra til betre oversikt, tryggare pasientforløp og mindre dobbeltarbeid – dersom dei blir brukt aktivt.
Eit viktig gap – og eit stort moglegheitsrom
Responsen frå deltakarane tyda på stort engasjement og ny læring. Samtidig vart det tydeleg at det finst eit betydeleg gap mellom eksisterande funksjonalitet og faktisk bruk i kvardagen. Dette peikar på eit stort moglegheitsrom for vidare opplæring, forankring og felles praksisutvikling.
Innlegget i Ålesund var det første av tre identiske foredrag ved medisinsk avdeling, og utgjer eit viktig tiltak i det vidare SamOpp-arbeidet med å hente ut samhandlingsgevinstane i Helseplattformen.