Spesialisering i bryst- og endokrinkirurgi ved Ålesund sjukehus
Bryst- og endokrinkirurgisk seksjon er ein del av kirurgisk avdeling. Kirurgisk avdeling i Ålesund er ei seksjonert avdeling med gastrokirurgi, urologi, karkirurgi, generell kirurgi og bryst-/endokrinkirurgi. Det er to sengepostar og utstrakt poliklinisk og operativ aktivitet ved avdelinga. Vi er til saman 16 overlegar (derav 4 konstituerte) og 9 LIS. LIS går i 9-delt vaktordning med tilstadevakt der døgnet er delt i to. Vi fungerer som ei felles avdeling med felles morgonmøter, internundervisning og vaktordning. Det er seksjonert bakvaktordning i karkirurgi, urologi og gastrokirurgisk kirurgi. Det er ingen bakvaktsordning/beredskap for bryst- og endokrinkirurgi.
Bryst- og endokrinkirurgi har p.t. 1 spesialist, 1 konstituert overlege, 1 LIS3 og 1 LIS2 i rotasjon som er knytta til seksjonen. Frå slutten av 2025 får vi endå ein spesialist. I periodar er der også rotasjonskandidat (LIS2) tilknytta seksjonen. Kvart år opererer vi om lag 400 pasientar, hovudvekt av pasientar er dagkirurgiske. Vidare har vi ca 2100 polikliniske kontakter.
Vi deler sengepost med andre kirurgiske fag, men har 1,5 dedikerte bryst-endokrinkirurgiske senger. Det er fleksibel utnytting av sengane på sengeposten og i perioder har vi derfor fleire innlagde pasientar.
Vi har fylkesansvar for bryst- og endokrinkirurgisk tilbodet til befolkninga i Møre og Romsdal – ca 270 000 innbyggarar.
Vi utfører det meste av bryst- og endokrinkirurgiske operasjonar, med unntak av operasjon for binyrer og cancer thyreoidea som er sentralisert til St. Olavs Hospital. Utgreiing og kontroll av cancer thyreoidea gjerast i Ålesund. Det plastikkirurgiske miljøet i foretaket er i SNR. Det er tett samarbeid med plastikkirurg frå SNR i samband med primær rekonstruksjon og onkoplastikk, operasjonane utførast i Ålesund.
Vidare er det tett samarbeid med radiologar ved brystdiagnostisk senter i Ålesund og med radiologar ved SNR. Mammografiscreening foregår både i Ålesund, SNR og mammografibuss på Nordmøre. Radiologar i Ålesund granskar alle screeningbilder og utgreier selekterte pasientar.
Utdanningskandidatar i bryst- og endokrinkirurgi får teneste ved dei andre kirurgiske seksjonane for å kunne få oppfylt læringsmåla i del 2 felles kirurgi.
Delar av tjenesta ved vår seksjon er utan deltaking i vakt, slik at ein raskt oppnår kompetanse og kan gjere fleire sjølvstendige vurderingar. Utdanningskandidatane får eigen poliklinikk og deltek på mange inngrep i lag med overlege. I løpet av tenesta må ein også ha den nødvendige rotasjonstenesta med deltaking i vakt elles ved avdelinga. Det er lagt opp til om lag 12 månader spesialiseringsperiode ved universitetssjukehus. Vi har avtale med St. Olavs Hospital i Trondheim for slik teneste.
Når du startar hos oss blir du tatt godt imot og introdusert i avdelinga! Du får omvisning og nødvendig opplæring i rutiner, prosedyrer og dataprogram du skal bruke. Deretter blir du raskt sett i arbeid der overlege alltid er tilgjengelig for spørsmål. Du får opplæringsvakter før du starter sjølvstendige vakter.
Vi har lagt opp til to timar internundervisning kvar veke. Halvparten er fellesundervisning ved kirurgisk avdeling og den andre halvparten er seksjonen si eiga internundervisning. Avdelinga legg til rette for at ein kan delta på fagdagar i samarbeid med kreftavdelinga. Internundervisninga er tilpassa læringsmåla og vi følgjer eit undervisningsopplegg over om lag 2 år. Det er felles internundervisning for heile sjukehuset ein time kvar månad.
I tillegg til dette legg ein til rette for at LIS skal kunne delta på årleg regionale møter (Midtnorsk forum, tema mamma i Trondheim). Det er også fagmøte årleg innad i fylket, for alle som er involvert i behandling/diagnostikk av brystkreft.
Du får delta på nasjonalt anbefalte kurs som er nødvendig for å kunne fullføre spesialiteten.
Vi trener traumeteam jamleg ved avdelinga. Vi har og ein D-boks for å øve på laparaskopiske ferdigheter.
Vi er ei lita eining og jobbar tett saman. Vi blir derfor fort kjent med kvarandre og det er låg terskel for kontakt når det er behov.
Ved visitt er alltid spesialist og LIS saman. På poliklinikken får du raskt dine eigne pasientar som du utreder, følgjer opp og eventuelt behandlar. Som regel har erfaren LIS/spesialist poliklinikk på naborommet, og det er kort veg for å spørje om hjelp. Kasuistikkar kan også diskuterast med BDS radiolog. Du får god tilgang til deltaking på operasjonsstua og opererer då alltid ilag med spesialist og får god opplæring etter meister-svenn-prinsippet.
Utdanningskandidaten får tildelt veiledar på oppstartstidspunkt, veiledar er utdanna spesialist. Ein tek sikte på veiledningssamtale månadleg. Her blir mellom anna utdanningsprogresjon og utdanningsplan gjennomgått.
Vi har faste multidisiplinære møter kvar veke, som LIS2/3 deltek på. Det er og høve til å delta på lokale, regionale og nasjonale faglege møter når dette passar for avdelinga.
Det er sett av tid til fagleg fordjuping tilsvarande 4 timar pr veke i arbeidsplanen.
Kvar enkelt læringsaktivitet og læringsmål blir fortløpande vurdert og dokumentert i Kompetanseportalen. Det er LIS si oppgåve å registrere alle læringsaktivitetar. For å sikre at du som LIS oppnår fagleg progresjon og innfrir kompetansekrava i spesialistutdanninga, vil det bli gjennomført regelmessig kompetansevurdering slik vi har beskrive over. Leiar har overordna ansvar for at læringsmål blir vurdert og godkjent og at dette blir dokumentert i Kompetanseportalen.
Vi har tre legar med PhD-grad og ein i PhD løp i kirurgisk avdeling. Foretaket har ei forskningsavdeling som ligg ved sjukehuset vårt og vi bruker denne ved behov. På seksjonen deltek vi i fleire forskingsprosjekt, både studier initiert av St. Olavs hospital og multisenterstudier nasjonalt/internasjonalt. LIS-legar hos oss deltek i arbeid med studiane og vert og oppmoda til å drive enkle registreringsarbeid, skrive artiklar og ha innlegg på kirurgisk haustmøte.
Felles kompetansemål er ei eiga gruppe av læringsmål som er felles for alle spesialitetar. Tema for desse læringsmåla er samhandling med pasientar og kollegaer, kommunikasjon, etikk, pasient- og pårørandeopplæring, pasient- og brukermedverknad, kvalitet og pasientsikkerheit, forskingsforståing, kunnskapshandtering og systemforståing, organisasjonsutvikling og leiing.
Felles kompetansemål er integrert i det daglege kliniske arbeidet. I tillegg er fleire av desse læringsmåla godt egna til tema for både individuell rettleiing og grupperettleiing. Fleire av læringsmåla blir dekt gjennom felles kurs på tvers av ulike spesialitetar organisert av helseføretaket. Sistnemnte gjeld mellom anna for kunnskapshandtering, forbetringsarbeid og forskingsforståing der den enkelte LIS skal delta på ei oppsett kursrekke i regi av helseføretaket. Som del av kurs i kunnskapshandtering og forbetringsarbeid skal det gjerast ei prosjektoppgåve i forbetringsarbeid. Denne kan gjennomførast i grupper dersom dette er ønskeleg, og gjerne internt i eiga avdeling. Tema for prosjektoppgåva bør drøftast med rettleiar og skal og avklarast med næraste leiar. I tillegg blir fleire læringsmål i FKM dekt i eit obligatorisk kurs om supervisjon, rettleiing og kommunikasjon som alle LIS i foretaket skal delta på.
Det er ønskeleg at felles kompetansemål blir fullført før ein reiser i rotasjonsteneste til universitetssjukehus.
Alle LIS skal ha ein individuell utdanningsplan. Denne skal beskrive både innhaldet i spesialistutdanninga og ein plan for korleis den enkelte skal gjennomføre sitt spesialiseringsløp. Den individuelle utdanningsplanen skal vere eit verktøy for planlegging og oppfølging av deg som LIS. Ved tilsetting av ny LIS har arbeidsgivar ansvar for å lage ein individuell utdanningsplan. Det er naturleg at denne blir utarbeidd i samråd med deg som LIS og rettleiar. I den individuelle utdanningsplanen skal det framgå mellom anna når ein ser føre seg å gjennomføre dei ulike rotasjonane, sentralteneste ved universitetssjukehus og teneste ved anna avdeling. Dette kan naturleg nok endre seg undervegs, men for best mogleg samkøyrt planlegging av utdanninga til fleire LIS i avdelinga er det nødvendig å kunne legge overordna planar litt fram i tid.
Det blir gjennomført møte i utdanningsutvalget kvart halvår. Utvalget består av seksjonsoverlegar, utdanningsansvarleg overlege og LIS2/3 representant.
Det er tillitsvalgte på både avdelings-, sjukehus- og foretaksnivå.
For meir informasjon, ta kontakt med:
Sverrir Olafsson, seksjonsoverlege.
Her finn du ei oversikt over andre spesialistutdanningar i Helse Møre og Romsdal.