Spesialisering i fødselshjelp og kvinnesjukdommar ved SNR
Avdeling for fødselshjelp og kvinnesjukdommar på Sjukehuset Nordmøre og Romsdal (SNR) er ei mellomstor avdeling med 10 overlegar og 6 LIS.
Den kliniske aktiviteten foregår ved gynekologisk poliklinikk, svangerskapspoliklinikken, kreftpoliklinikken, operasjonsavdelinga og føde/barselavdelinga. Vi deler sengepost med kirurgi/ortopedi der vi har nokre sengeplassar til rådigheit for våre inneliggande gynekologiske pasientar.
Gynekologisk poliklinikk og svangerskapspoliklinikk foregår i hovudsak på dagtid. Fleire dagar i veka er det også poliklinikk der det blir gjort tidleg ultralyd og rutineultralyd av eigne ultralydjordmødre.
Vi har planlagt kirurgi to faste dagar i veka, samt øvrige vekedagar for akutte inngrep. Det er fokus på minimalt invasiv kirurgi og dagkirurgi.
SNR er eit lokalsjukehus med generell gynekologisk aktivitet og fødeavdeling, og derfor er det hensiktsmessig for ferske LIS å starte utdanninga her. Du får raskt god oversikt over heile faget, og jobbar tett med overlegane. Ved rotasjon til universitetssjukehus må det leggast vekt på å få meir erfaring med fødselshjelp, fordjupe erverva kunnskap og komme i kontakt med pasientgrupper som etter nasjonale retningslinjer blir sendt til desse sjukehusa for videre behandling.
Du treng om lag 3 år hos oss for å kunne få oppfylt læringsmåla vi kan tilby her. I tillegg treng du eit år med kirurgisk teneste som kan gjerast på SNR, Ålesund sjukehus eller Volda sjukehus. Det er planlagt med 18 månader spesialiseringsperiode ved universitetssjukehus for å kunne få oppfylt læringsmåla vi ikkje tilbyr i vårt føretak. Vi har avtale om samarbeid med St. Olavs hospital i Trondheim og Oslo Universitetssjukehus. Vi samarbeider med kirurgisk avdeling på sjukehuset for nokre av læringsmåla. Du vil også bli godt kjent med røntgenavdelinga og medisinsk avdeling som vi samarbeider med for ulike problemstillingar, sjølv om du ikkje har teneste ved desse avdelingane.
Nye LIS blir tatt godt imot ved avdelinga og får innføring i vanlege arbeidsoppgåver. Arbeidet skjer under rettleiing og supervisjon og blir gradvis tilpassa arbeidsmengde og ansvarsområde etter den enkelte sine evne og kapasitet. Det blir tilrettelagt for og tilstrebast at du som LIS får kome i gang med nasjonale anbefalte kurs tidleg i utdanninga.
Det er laga ei felles undervisningsliste for heile føretaket med tema som skal vere gjennomgått i løpet av ei 2-års periode. Lista er revidert og tilpassa læringsmåla for ny spesialitetsstruktur.
Det er planlagt internundervisning saman med dei andre sjukehusa i føretaket. I tillegg er det sett av tid til undervising og trening i nyføddresucitering med instruktørar frå andre sjukehus. Alle legar skal delta på akuttdagar og nyføddresucitering.
Simulering og ferdigheitstrening i nyføddresucitering blir arrangert kvar sjette månad, der jordmødre, barnepleiarar og legar deltek. Det er tilsette frå nyfødt intensiv i Ålesund som held undervisninga. Ved årlege akuttdagar trenar vi ulike akuttsituasjonar.
Avdelinga er lita og oversiktleg og vi arbeider alle tett ilag. Det er overlege som har ansvar for å koordinere utdanninga ved avdelinga tilpassa nasjonale retningslinjer. Supervisjon vil foregå ved at du alltid har ein meir erfaren kollega, anten meir erfaren LIS eller spesialist, tilgjengelig for konferering og tilsyn ved gjennomføring av prosedyrar der det er ønskeleg eller nødvendig.
Du får tildelt rettleiar når du startar hos oss. Rettleiaren er spesialist. Det er sett av tid til rettleiing kva månad.
LIS har to fordjupningsdagar på til saman 16 timar kvar månad.
Kvar enkelt læringsaktivitet og læringsmål blir fortløpande vurdert og dokumentert i Kompetanseportalen. Det er LIS si oppgåve å registrere alle læringsaktivitetar. For å sikre at du som LIS oppnår fagleg progresjon og innfrir kompetansekrava i spesialistutdanninga, vil det bli gjennomført regelmessig kompetansevurdering slik vi har beskrive over. Leiar har overordna ansvar for at læringsmål blir vurdert og godkjent og at dette blir dokumentert i Kompetanseportalen.
Helse Møre og Romsdal har ei eiga forskingssavdeling som er tverrgåande i føretaket med aktivitet ved alle tre sjukehusa. Frå forskingsavdelinga får ein både hjelp og rettleiing i samband med forskingsprosjekt.
For å dekke læringsmål knytt til forsking og kunnskapshandtering i felles kompetansemål er det sett opp kurs over 2,5 dagar med undervisning i tema innan både forsking og forbetringsarbeid og i samband med dette vil du som LIS også gjennomføre eit forbetringsprosjekt lokalt. Det er tilsette i forskingsavdelinga og seksjon for helsetenesteutvikling som deltek i undervisninga ved desse interne kursa.
Vi har per i dag ingen forskingsaktivitet i avdelinga.
Felles kompetansemål er ei eiga gruppe av læringsmål som er felles for alle spesialitetar. Tema for desse læringsmåla er samhandling med pasientar og kollegaer, kommunikasjon, etikk, pasient- og pårørandeopplæring, pasient- og brukermedverknad, kvalitet og pasientsikkerheit, forskingsforståing, kunnskapshandtering og systemforståing, organisasjonsutvikling og leiing.
Felles kompetansemål er integrert i det daglege kliniske arbeidet. I tillegg er fleire av desse læringsmåla godt egna til tema for både individuell rettleiing og grupperettleiing. Fleire av læringsmåla blir dekt gjennom felles kurs på tvers av ulike spesialitetar organisert av helseføretaket. Sistnemnte gjeld mellom anna for kunnskapshandtering, forbetringsarbeid og forskingsforståing der den enkelte LIS skal delta på ei oppsett kursrekke i regi av helseføretaket. Som del av kurs i kunnskapshandtering og forbetringsarbeid skal det gjerast ei prosjektoppgåve i forbetringsarbeid. Denne kan gjennomførast i grupper dersom dette er ønskeleg, og gjerne internt i eiga avdeling. Tema for prosjektoppgåva bør drøftast med rettleiar og skal og avklarast med næraste leiar. I tillegg blir fleire læringsmål i FKM dekt i eit obligatorisk kurs om supervisjon, rettleiing og kommunikasjon som alle LIS i foretaket skal delta på.
Det er ønskeleg at felles kompetansemål blir fullført før ein reiser i rotasjonsteneste til universitetssjukehus.
Alle LIS skal ha ein individuell utdanningsplan. Denne skal beskrive både innhaldet i spesialistutdanninga og ein plan for korleis den enkelte skal gjennomføre sitt spesialiseringsløp. Den individuelle utdanningsplanen skal vere eit verktøy for planlegging og oppfølging av deg som LIS. Ved tilsetting av ny LIS har arbeidsgivar ansvar for å lage ein individuell utdanningsplan. Det er naturleg at denne blir utarbeidd i samråd med deg som LIS og rettleiar. I den individuelle utdanningsplanen skal det framgå mellom anna når ein ser føre seg å gjennomføre dei ulike rotasjonane, sentralteneste ved universitetssjukehus og teneste ved anna avdeling. Dette kan naturleg nok endre seg undervegs, men for best mogleg samkøyrt planlegging av utdanninga til fleire LIS i avdelinga er det nødvendig å kunne legge overordna planar litt fram i tid.
Utdanningsutvalet består av utdanningsansvarlig overlege for SNR og ein LIS frå kvart sjukehus. Det er overlege som leiar utdanningsutvalet. Utvalet har som hovudoppgåve å planlegge internundervisning og arbeide med kvalitetsforbetring for utdanninga.
Avdelinga har YLF-tillitsvalt, og det opplevast at interesser blir ivaretatt på ein god måte. Det er låg terskel for kontakt med tillitsvalt ved avdelinga ved behov. Det er elles og YLF-tillitsvalt på sjukehus- og føretaksnivå.
- Frank Walter, overlege, seksjonsleiar, Jfrank.walter@helse-mr.no, 93 65 74 04.
Her finn du ei oversikt over andre spesialistutdanningar i Helse Møre og Romsdal.