Vi tilrår at du alltid nyttar siste versjon av nettlesaren din.

Spesialisering i kreftsjukdommar ved Sjukehuset Nordmøre og Romsdal

Onkologisk poliklinikk ved SNR er ein del av tverrgåande Klinikk for kreftbehandling og rehabilitering i Helse Møre og Romsdal. Behandlingstilbodet omfattar poliklinikk ved Hjelset, med noko behandling også i Kristiansund. Ved Hjelset finst ein medisinsk sengepost med 15 senger for pasientar innan hematologi, kreft og palliasjon. Organiseringa av sengeposten vil bli endeleg avklart i løpet av 2025.

Seksjonen har 5 heimlar for spesialistar i onkologi og 2 heimlar for LIS-stillingar.

Om lag 80–85 % av behandlinga ved onkologisk poliklinikk er cytostatika og immunterapi, medan resten er andre infusjonar, injeksjonar og blodoverføringar. Som LIS vil du ha onkologisk poliklinikk som hovudarena for læring, der du under rettleiing deltek i vurdering av nye pasientar, dosering av cellegift og evaluering av behandlingseffekt. Du vil veksle mellom teneste ved onkologisk poliklinikk og sengepost for hematolologi, kreft og palliasjon. Det er òg mogleg å delta i LIS-vakter ved Kreftavdelinga i Ålesund.

Ved tilsetjing får du:

  • Individuell utdanningsplan
  • Læringsmålplan i Kompetanseportalen
  • Skriftleg oversikt over arbeidsoppgåver
  • Tilgang til relevante introduksjonskurs
  • Fadderordning

Desse fagområda kan dekkast ved SNR:  

  1. Gastroenterologisk kreft
  2. Brystkreft (inkl. delar av gynekologisk kreft)
  3. Palliativ behandling
  4. Kreft med ukjent utgangspunkt, nevroendokrine svulstar og endokrin kreft (i samarbeid med Ålesund)
  5. Indremedisinsk teneste

Desse fagområda må dekkast i – eller i tett samarbeid med Ålesund:

  1. Urologisk kreft og melanom.
    – inkludert læringsmål for skjoldbruskkjertelkreft, CNS-kreft og sarkom.
  2. Stråleterapi (6–12 månader).

Sentralteneste

Det er krav om sentralteneste ved universitetssjukehus for å oppfylle dei læringsmåla vi ikkje kan tilby ved SNR og Ålesund sjukehus. For læringsmål som ikkje kan dekkast lokalt, har vi samarbeidsavtalar med St. Olavs hospital og Oslo universitetssjukehus. Alternativt kan LIS sjølv organisere teneste ved andre universitetssjukehus.

Læringsmål som krev sentralteneste omfattar:

  • Lymfombehandling.
  • Noko klinisk teneste ved testikkelkreft og sarkom.
  • Innteikning av strålefelt ved lymfom og ØNH-kreft i kurativ setting.
  • Leukemi, myelomatose og delar av lungekreftbehandling.

I tillegg til teneste ved onkologiske avdelingar lokalt og sentralt, er det nødvendig med tjeneste ved indremedisinsk avdeling. Dette for å dekke læringsmål for indremedisin, samt læringsmål knytt til leukemi/myelomatose og til dels lungekreft.

Læringsarenaer

  • Onkologisk poliklinikk, SNR.
  • Medisinsk avdeling, SNR.
  • Kreftavdelinga, Ålesund sjukehus.
  • Kreftklinikken, St. Olavs hospital.
  • Avdeling for kreftbehandling, Oslo Universitetssykehus.

Tenesta ved SNR utgjer om lag 2,5 år (inkl. indremedisin), i tillegg til 1,5 år i Ålesund og 1 år ved universitetssjukehus. Samansetninga vert planlagt i samarbeid med deg.

Som ny LIS får du eit introduksjonsskriv med oversikt over rutinar og oppgåver for onkologisk poliklinikk. Du vil få omvisning og opplæring i Cytodose (Bestillingsprogram for medikamentell kreftbehandling). Seksjonen har fadderordning.

Vi har felles interundervisning med Kreftklinikken ved St.Olavs hospital ein gong per veke (40 minutt) og internundervisning ein gong per veke ved Ålesund sjukehus (30 min). Som LIS ved SNR, er du ein del av LIS-kollegiet i Ålesund og deltek fysisk på fagdagar (7.5 timer) ein gong kvar månad. Fagdagane for LIS ved avdelinga dekkjer dei store tumorgruppene med tilhøyrande relevante læringsmål. Fellesundervisninga med St. Olavs hospital vert planlagt for seks månader om gongen, og omfattar dei store tumorgruppene med tilknytta relevante læringsmål i løpet av ein toårsperiode.

Ved onkologisk poliklinikk SNR er det i tillegg lokal undervisning ein gong per månad for alle tilsette («Tumor og twist»), og artikkellunsj ein gong per månad i legekollegiet. Vi planlegg i tillegg å opprette ein LIS-spesifikk undervisningstime ein gong per månad, for å kvalitetssikre at dei generelle onkologiske læringsmåla blir dekt.

Det vert lagt til rette for at LIS skal kunne delta på 1–2 anbefalte kurs kvart halvår. Alle LIS skal gjennomføre kurs i GCP (Good Clinical Practice), samt kurs i forbetringsarbeid og forskingsforståing. Dei to sistnemnde inngår som del av dei felles kompetansemåla.

Praktisk trening (t.d. prosedyrar, AHLR, brannkurs) vert organisert i samarbeid med Medisinsk avdeling SNR og Kreftavdelinga i Ålesund.

LIS og overlege arbeider tett saman i det daglege, og supervisjon skjer både ved poliklinikken og på sengeposten. I det palliative teamet er det nært samarbeid mellom LIS og overlege, både for inneliggande pasientar, ved heimebesøk og ved tilsyn på andre avdelingar. Alle overlegar som arbeider saman med LIS har ansvar for supervisjon.

Seksjonen har ein godt innarbeidd kultur for supervisjon, og det er låg terskel for å ta kontakt med meir erfarne kollegaer ved behov. Alle LIS får oppnemnt ein rettleiar ved tilsetjing. Det skal gjennomførast rettleiingssamtalar ein gong per månad (60 minutt), og desse er avsett i arbeidsplanen. Samtalane skal dokumenterast i Kompetanseportalen.

I tillegg til individuell rettleiing vil seksjonen frå hausten 2025 innføre grupperettleiing annakvar månad (60 minutt).

Når det gjeld evaluering av fagleg utvikling for den enkelte LIS, skjer dette både gjennom det daglege arbeidet saman med overlege, og meir formalisert gjennom vurderingskollegium. Fagleg progresjon og utvikling er også eit naturleg tema i rettleiingssamtalane.

Kvar enkelt læringsaktivitet og læringsmål blir fortløpande vurdert og dokumentert i Kompetanseportalen. Det er LIS si oppgåve å registrere alle læringsaktivitetar. For å sikre at du som LIS oppnår fagleg progresjon og innfrir kompetansekrava i spesialistutdanninga, vil det bli gjennomført regelmessig kompetansevurdering slik vi har beskrive over. Leiar har overordna ansvar for at læringsmål blir vurdert og godkjent og at dette blir dokumentert i Kompetanseportalen.​

Kreftklinikken i Helse Møre og Romsdal deltek aktivt i fleire forskingsprosjekt og har eit eige forskingsutval. Når GCP-kurset er gjennomført, vil LIS som ein naturleg del av arbeidet ta del i oppfølginga av pasientar som deltek i ulike forskingsprosjekt. Kreftklinikken legg til rette for at LIS kan vere med i forskingsarbeid. Ved Kreftpoliklinikken ved SNR har to av tre onkologar doktorgrad eller er i eit PhD-løp, og har forsking som ein del av stillinga si.

Føretaket har ei eiga forskingsavdeling som er tverrgåande og har aktivitet ved alle sjukehusa. Frå forskingsavdelinga får ein både rettleiing og støtte i samband med forskingsprosjekt.

For å dekkje læringsmål knytt til forsking og kunnskapshandtering i dei felles kompetansemåla, er det sett opp eit kurs over 2,5 dagar med undervisning i tema innan både forsking og forbetringsarbeid. I samband med dette skal du som LIS også gjennomføre eit lokalt forbetringsprosjekt. Tilsette frå forskingsavdelinga og seksjon for helsetenesteutvikling deltek i undervisninga ved desse interne kursa.

Felles kompetansemål er ei eiga gruppe av læringsmål som er felles for alle spesialitetar. Tema for desse læringsmåla er samhandling med pasientar og kollegaer, kommunikasjon, etikk, pasient- og pårørandeopplæring, pasient- og brukermedverknad, kvalitet og pasientsikkerheit, forskingsforståing, kunnskapshandtering og systemforståing, organisasjonsutvikling og leiing.

Felles kompetansemål er integrert i det daglege kliniske arbeidet. I tillegg er fleire av desse læringsmåla godt egna til tema for både individuell rettleiing og grupperettleiing. Fleire av læringsmåla blir dekt gjennom felles kurs på tvers av ulike spesialitetar organisert av helseføretaket. Sistnemnte gjeld mellom anna for kunnskapshandtering, forbetringsarbeid og forskingsforståing der den enkelte LIS skal delta på ei oppsett kursrekke i regi av helseføretaket. Som del av kurs i kunnskapshandtering og forbetringsarbeid skal det gjerast ei prosjektoppgåve i forbetringsarbeid. Denne kan gjennomførast i grupper dersom dette er ønskeleg, og gjerne internt i eiga avdeling. Tema for prosjektoppgåva bør drøftast med rettleiar og skal og avklarast med næraste leiar. I tillegg blir fleire læringsmål i FKM dekt i eit obligatorisk kurs om supervisjon, rettleiing og kommunikasjon som alle LIS i foretaket skal delta på.

Det er ønskeleg at felles kompetansemål blir fullført før ein reiser i rotasjonsteneste til universitetssjukehus. ​

Alle LIS skal ha ein individuell utdanningsplan. Denne skal beskrive både innhaldet i spesialistutdanninga og ein plan for korleis den enkelte skal gjennomføre sitt spesialiseringsløp. Den individuelle utdanningsplanen skal vere eit verktøy for planlegging og oppfølging av deg som LIS. Ved tilsetting av ny LIS har arbeidsgivar ansvar for å lage ein individuell utdanningsplan. Det er naturleg at denne blir utarbeidd i samråd med deg som LIS og rettleiar. I den individuelle utdanningsplanen skal det framgå mellom anna når ein ser føre seg å gjennomføre dei ulike rotasjonane, sentralteneste ved universitetssjukehus og teneste ved anna avdeling. Dette kan naturleg nok endre seg undervegs, men for best mogleg samkøyrt planlegging av utdanninga til fleire LIS i avdelinga er det nødvendig å kunne legge overordna planar litt fram i tid.​

Utdanningsutvalet ved avdelinga er sett saman av utdanningsansvarleg overlege, ein ekstra overlegerepresentant og ein LIS. Utvalet har 2–4 møte per halvår og har eit overordna ansvar for å planleggje undervisninga og sikre at LIS-utdanninga skjer i samsvar med gjeldande utdanningsplan.

Utdanningsutvalet har også ansvar for å følgje opp gjennomføringa av læringsmåla, både i den kliniske og teoretiske utdanninga, og for å halde utdanningsplanen oppdatert.

LIS-kollegiet har ein eigen tillitsvald som følgjer opp dialogen med leiinga knytt til arbeidsplanar og andre relevante forhold.

For spørsmål om spesialistutdanninga, kontakt:

Utdanningsansvarlig overlege Ida Kristine Brandal, tlf 70 10 50 00 (via sentralbordet).

Tillitsvald for LIS-gruppa:

Maria Ringset, telefon 70 10 69 12.

 

 

Sist oppdatert 08.08.2025