Spesialisering i urologi ved Ålesund sjukehus
Kirurgisk avdeling er ei fullseksjonert avdeling der urologisk seksjon utgjer ein av seksjonane, i tillegg til gastroenterologisk kirurgi, karkirurgi og bryst- og endokrinkirurgi. Ved avdelinga er det 12 spesialistar, 4 konstituerte overlegar og 8 LIS. Litt avhengig av fagfelt og kompetanseområde, dekker vi eit nedslagsfelt på omlag 100 000 – 270 000 innbyggjarar. Det er felles generellkirurgisk vaktordning der LIS går i 9 delt tilstadevakt med vaktdøgnet delt i to. Det er seksjonert bakvaktordning i karkirurgi, urologi og gastrokirurgisk kirurgi 24/7.
Ved urologisk seksjon er vi 3 overlegar, ein LIS3 i urologi og ein LIS2 i rotasjonsstilling. Vi har og tilsett 2 uroterapeutar, samt 2 under utdanning. Vi har ansvar for urologisk pasienttilbod på Sunnmøre og fylkesfunksjon for utgreiing og behandling av nyretumores. Vi har om lag 760 innlagde pasientar kvart år, og om lag 130 dagpasientar. I tillegg har vi rundt 100 dagkirurgiske inngrep i året, 640 større inngrep og om lag 4 400 polikliniske konsultasjonar.
Vi har fylkesfunksjon for nyrekirurgi, kirurgi ved testiscancer og for avanserte urodynamiske undersøkingar. I tillegg har vi eit bredt tilbod innan generell urologisk utgreiing, behandling og nødvendig etterkontroll.
Av utstyr kan vi mellom anna nemne: 3D-laparaskopiutstyr, thuliumlaser for endoskopisk steinknusing, MR/UL fusjonsmaskin, utstyr for avansert urodynamiske undersøkingar og alt av nødvendig utstyr for transuretral diagnostikk og behandling av vaksne. Vi har førebels ikkje operasjonsrobot.
Som LIS hos oss får du tilgang til stort volum av kvardagsurologien, men og god tilgang på meir sjeldne diagnoser og prosedyrer då vi har fylkesfunksjon for nokre fagområde og er den største urologiske eininga i fylket. Dagane brukast til arbeid på sengeposten, operasjonsavdelinga, dagkirurgisk eining og poliklinikken. Vi tilpassar arbeidsoppgåvene til ditt kompetansenivå og tilser at du får stadig meir avanserte oppgåver for å auke kompetansen og få ønskeleg progresjon. Seksjonen har operativ og poliklinisk aktivitet dagleg, i tillegg dagkirurgi ein gong pr veke.
På sengepost er det felles previsitt med overlege, visitt av og til med supervisjon. Operasjonar blir assistert inntil dei kan gjerast sjølvstendig. Større inngrep er alltid teamarbeid. Som LIS hos oss blir du alltid sett opp på alle operasjonar når du er ved seksjonen, utanom ved vakt og poliklinikk. Ved poliklinikken arbeider ein sjølvstendig, men med tilpassa pasientgrupper og arbeidsmengde etter kompetansenivå. Det er god tilgang på overlege for råd og hjelp etter behov. Vi tilstreber at same lege utgreier, behandlar og følgjer opp pasienten.
Vi deltek vekentleg i regionalt urologisk MDT-møte og har i tillegg tett samarbeid med onkologar og radiologar lokalt.
Ved avdelinga roterer du mellom seksjonane for å kunne få oppfylt læringsmål i del 2 felles kirurgi. I tillegg til denne tenesta treng du om lag to år ved vår seksjon for å kunne få oppfylt dei læringsmåla vi har tilbod om. I tillegg til dette treng du 1-1,5 år spesialiseringsperiode ved universitetssjukehus for å kunne få oppfylt dei resterande læringsmåla vi ikkje har tilbod om i Møre og Romsdal. Vi har avtale med St. Olavs hospital for slik teneste.
Nye LIS som startar på avdelinga får nødvendig opplæring i våre rutiner og dataverktøy. Du får og følgevakt før du startar sjølvstendige vakter.
Ved seksjonen blir du raskt inkludert i miljøet og vi tilpassar opplæringa ditt behov.
Det er internundervisning 2 undervisningstimar i veka. Kvar onsdag er det felles undervisning for heile kirurgisk avdeling, det vekslar mellom seksjonane å halde innlegg her. Kvar torsdag er det seksjonsvis undervisning. Det er felles internundervisning for urologi i heile helseforetaket. Vi tilstrebar å dekke sentrale læringsmål i løpet av 2 års periode for internundervisning. LIS har tilbod om å delta på relevante fagdagar som blir arrangert av kreftavdelinga. Ein time kvar månad er det felles internundervisning for heile sjukehuset.
Vi legg til rette for at du får delta på nasjonalt anbefalte kurs som er nødvendig for spesialiteten.
Det er ein D-boks for å øve på laparaskopiske inngrep på avdelinga. Du får elles opplæring i alle prosedyrer før du gjer dei sjølvstendig med nødvendig supervisjon, og det er god tilgang på prosedyrer av ulike slag ved seksjonen.
Vi er ei lita eining og jobbar tett saman. Vi blir derfor fort kjent med kvarandre og det er låg terskel for kontakt når det er behov.
Ved visitt er alltid spesialist og LIS saman. På poliklinikken får du raskt dine eigne pasientar som du utreder, følgjer opp og eventuelt behandlar. Det er alltid kort veg for å be om hjelp, og kasuistikkar kan også diskuterast i kollegiet. Du får god tilgang til deltaking på operasjonsstua og opererer då alltid ilag med spesialist og får god opplæring etter meister-svenn-prinsippet.
Du får tildelt rettleiar når du kjem til oss, og denne er spesialist i urologi. Det blir sett av ein time kvar måned til rettleiing. Her blir mellom anna utdanningsprogresjon og utdanningsplan gjennomgått. I tillegg er det vurderingskollegium ca kvar 6 månad. Sjukehuset har også tilbod om tverrfagleg gruppeveiledning for LIS.
Det er sett av tid til fagleg fordjuping tilsvarande 4 timar pr veke i arbeidsplanen.
Kvar enkelt læringsaktivitet og læringsmål blir fortløpande vurdert og dokumentert i Kompetanseportalen. Det er di oppgåve å registrere alle læringsaktivitetar du gjer. For å sikre at du som LIS oppnår fagleg progresjon og innfrir kompetansekrava i spesialistutdanninga, vil det bli gjennomført regelmessig kompetansevurdering slik vi har beskrive over. Leiar har overordna ansvar for at læringsmål blir vurdert og godkjent og at dette blir dokumentert i Kompetanseportalen.
Vi har ingen legar med PhD ved seksjonen. Det er ingen eigne pågåande forskingsprosjekt. Helse Møre og Romsdal har eiga forskingsavdeling som bistår med råd og rettleiing til dei som ønsker å drive forsking.
Felles kompetansemål er ei eiga gruppe av læringsmål som er felles for alle spesialitetar. Tema for desse læringsmåla er samhandling med pasientar og kollegaer, kommunikasjon, etikk, pasient- og pårørandeopplæring, pasient- og brukermedverknad, kvalitet og pasientsikkerheit, forskingsforståing, kunnskapshandtering og systemforståing, organisasjonsutvikling og leiing.
Felles kompetansemål er integrert i det daglege kliniske arbeidet. I tillegg er fleire av desse læringsmåla godt egna til tema for både individuell rettleiing og grupperettleiing. Fleire av læringsmåla blir dekt gjennom felles kurs på tvers av ulike spesialitetar organisert av helseføretaket. Sistnemnte gjeld mellom anna for kunnskapshandtering, forbetringsarbeid og forskingsforståing der den enkelte LIS skal delta på ei oppsett kursrekke i regi av helseføretaket. Som del av kurs i kunnskapshandtering og forbetringsarbeid skal det gjerast ei prosjektoppgåve i forbetringsarbeid. Denne kan gjennomførast i grupper dersom dette er ønskeleg, og gjerne internt i eiga avdeling. Tema for prosjektoppgåva bør drøftast med rettleiar og skal og avklarast med næraste leiar. I tillegg blir fleire læringsmål i FKM dekt i eit obligatorisk kurs om supervisjon, rettleiing og kommunikasjon som alle LIS i foretaket skal delta på.
Det er ønskeleg at felles kompetansemål blir fullført før ein reiser i rotasjonsteneste til universitetssjukehus.
Alle LIS skal ha ein individuell utdanningsplan. Denne skal beskrive både innhaldet i spesialistutdanninga og ein plan for korleis den enkelte skal gjennomføre sitt spesialiseringsløp. Den individuelle utdanningsplanen skal vere eit verktøy for planlegging og oppfølging av deg som LIS. Ved tilsetting av ny LIS har arbeidsgivar ansvar for å lage ein individuell utdanningsplan. Det er naturleg at denne blir utarbeidd i samråd med deg som LIS og rettleiar. I den individuelle utdanningsplanen skal det framgå mellom anna når ein ser føre seg å gjennomføre dei ulike rotasjonane, sentralteneste ved universitetssjukehus og teneste ved anna avdeling. Dette kan naturleg nok endre seg undervegs, men for best mogleg samkøyrt planlegging av utdanninga til fleire LIS i avdelinga er det nødvendig å kunne legge overordna planar litt fram i tid.
Det blir gjennomført møte i utdanningsutvalet kvart halvår. Utvalet består av seksjonsoverlegar, utdanningsansvarleg overlege og LIS2/3 representant.
Det er eigen YLF-tillitsvalt på avdelings-, sjukehus- og føretaksnivå.
For spørsmål om spesialistutdanninga, ta kontakt med:
Valborg Bakke, seksjonsoverlege og spesialist i generell kirurgi og urologi.
Her finn du ei oversikt over andre spesialistutdanningar i Helse Møre og Romsdal.