UTDANNING OG KOMPETANSE
Samla legar i spesialisering til nasjonalt kurs i handkirurgi
Kurset gav eit breidt og innhaldsrikt innblikk i ulike problemstillingar som ortopedane kan møte i kvardagen. Arrangementet og kurslokala vart positivt mottatt, seier senterleiar og ortoped Andreas Dalen
![En gruppe mennesker i et rom](/4a9b0e/contentassets/d5c2ca70f16643a5b1df1dd93699cf33/bilde1_dalen.jpg?format=webp&width=900&height=600&quality=80)
Hendene våre er finmekanikk på sitt ypperste. Derfor er handkirurgi spesielt komplekst og krev høg kompetanse og mykje trening. Fem dagar i september møttest 45 LIS-legar frå heile Norge til nasjonalt kurs i hand- og revmakirurgi i Ålesund. Kurset var ein kombinasjon av førelesingar og praktiske sesjonar.
Senterleiar og ortoped Andreas Dalen seier kurset er ein obligatorisk og viktig del av utdanninga til ortopedar innan dei nemnde fagområda.
- Det er essensielt at vi har høg kvalitet på desse utdanningskursa for at neste generasjon av ortopediske kirurger skal få den kunnskapen dei treng i den kliniske kvardagen. Gjennom kurset fekk deltakarane både kunnskap og eit nettverk som er viktig vidare i karrieren deira, seier Dalen som gjennomførte den prakiske sesjonen på Kunnskapssenteret.
![En gruppe mennesker som sitter ved bordene](/4a9c2c/contentassets/d5c2ca70f16643a5b1df1dd93699cf33/bilde2_dalen.jpg?width=770&quality=80)
I tillegg gav kurset eit breidt og innhaldsrikt innblikk i ulike problemstillingar som ortopedane kan møte i arbeidskvardagen.
- Kurset er meint å dekke alle relevante problemstillingar innan desse fagområda. Døme på desse inkluderar amputerte fingrar, frostskadar, seneskadar, artrose eller medfødde deformitetar, fortel Morten Eikrem, som er ansvarleg arrangør saman med Tor-Johannes Stray Slørdahl.
Kurset har vore arrangert i Ålesund i nokre år tidlegare, mellom anna ved patologens lokale i kjelleretasjen på Ålesund sjukehus. I år flytta kursleiarane kurset til dei nye lokala til Kunnskapssenteret Ålesund sjukehus.
At kurset vert arrangert i byen og dei nye lokala har betydelege gevinstar for sjukehuset og helseføretaket.
![En gruppe mennesker i blå skrubb i et rom](/4a9bea/contentassets/d5c2ca70f16643a5b1df1dd93699cf33/bilde5.jpg?width=770&quality=80)
- At vi har dette kurset i Ålesund og på vårt eget sykehus gir mange positive ringvirkninger. Det er engasjerende for avdelingen, vi får et løft i kunnskap og gode kontakter med miljøet ellers i Norge. Det er også viktig for å vise fram sykehuset og regionen for framtidig rekruttering av kommende ortopediske kirurger, både LIS og overleger.
På sjukehuset får deltakarane delta i praktiske anatomitrening sesjonar i det nye Ålesund Biomechanics Lab/Kunnskapssenteret.
- Vi håpar å kunne behalde dette som eit fast kurs i Ålesund, avsluttar Dalen.
![En gruppe mennesker som sitter rundt et bord og ser på en presentasjon](/4a9cd3/contentassets/d5c2ca70f16643a5b1df1dd93699cf33/bilde4_dalen.jpg?width=504&height=336.168&quality=80&format=webp)