Hei, du må oppdatere nettleseren din for å kunne besøke oss.
Akvarell av fasaden til barne- og ungdomsavdelinga. Et moderne bygg med farga glass i vindua og søyler i oransje, gult, rødt og grønt som markerer inngangen til avdelinga. .

Nyfødt intensiv

Nyfødt intensiv tek imot sjuke og for tidleg fødde barn frå heile fylket. Avdelinga har spesialkompetanse innan nyfødtmedisin med behandling av akutte og kronisk sjuke nyfødde og premature. Målet vårt er å gi familiebasert omsorg, der de som foreldre er med frå første stund. På denne sida finn de praktisk informasjon og råd om stell og omsorg.

Velkomen til oss

Gratulerer med barnet! Vi ønskjer at opphaldet på Nyfødt intensiv skal bli så godt som mogleg for dykk.

Om nyfødt intensiv

Nyfødt intensiv tar imot premature barn frå veke 26, sjuke nyfødde og spedborn inntil 3 månaders alder. Primært skal seksjonen dekke Møre og Romsdal, men ved behov behandlar vi og pasientar frå andre fylke, mellom anna frå Vestland.

Dei fleste sjukepleiarane hos oss har spesialkompetanse innan nyføddmedisin. Nokre av legane har og spesialutdanning i nyføddmedisin.

Kvifor må barn ligge på Nyfødt intensiv?

  • Barnet er for tidleg fødd
  • Barnet har for lita vekt i forhold til alderen
  • Barnet har pustevansker
  • Barnet har ein infeksjon
  • Barnet har ernæringsproblem
  • Barnet har gulsott
  • Barnet treng overvaking etter ein vanskeleg fødsel
  • Barnet har ein medfødt feil
  • Det kan vere eit behov når mor har diabetes

Dei minste pasientane kan ha behov for å ligge fleire månader i seksjonen, mange fullborne treng ofte berre nokre timar med observasjon.

Rom på avdelinga

Akvarell av en kuvøse.

Illustrasjon: Astrid Bjørneseth

Kuvøse. 

Avdelinga har fleire rom med kuvøse og senger, og fire familierom. Kva rom barnet får, kjem an på tilstanden til barnet. Barnet kan bli flytta mellom rom utan at de får beskjed. Familieromma er for barn som kan vere saman med foreldra heile døgnet. 

Foreldra har tilgang til spise- og opphaldsrom, dusj og toalett. Det finst også rom for reint og skittent pumpeutstyr. 

Tilgjengeleg heile døgnet

Avdelinga er open for foreldra heile døgnet. På kveld og helg kjem de inn via porttelefon – trykk B7600 og presenter dykk. De kan ringe avdelinga når som helst for å snakke med den som passar barnet. Telefon: 70 16 76 00 eller 70 16 76 01. 

Ved innlegging på nyfødt intensiv

Nokre har fått omvising før barnet kjem, andre kjem akutt. Det kan vere mange til stades når barnet blir tatt imot, og fleire oppgåver skal gjerast, spesielt i starten. Vi informerer fortløpande, og de får ei oppsummering etter etableringsfasen. 

De vil møte mange tilsette, men vi prøver å gi kvar familie faste kontaktsjukepleiarar og ansvarleg lege. De får fortløpande informasjon om barnet dykkar frå dei som har ansvar. Vi kan også tilby samtale med sosionom, prest eller akutt psykisk helseteam om det er behov. 

Akvarell av en kvinne med en nyfødt liggende på brystet, hud mot hud.

Illustrasjon: Astrid Bjørneseth

Kengerumottak, hud mot hud.

Mottak på fødeavdelinga - Kengurumottak

Barn fødde etter 32 veker og som treng opphald på Nyfødt intensiv får tilbod om kengurumottak. Lege og sjukepleiar frå Nyfødt intensiv er med under og etter fødselen. Barnet blir lagt hud mot hud med mor med ein gong. Lege og sjukepleiar undersøker barnet medan det ligg hos mor. Målet er at barnet og foreldra får vere saman dei første to timane etter fødselen. Deretter blir barnet flytta til Nyfødt intensiv, gjerne hud mot hud med ein av foreldra. 

NIDCAP

Det som er spesielt for nyføddseksjonen i Ålesund, er at vi arbeidar fast etter NIDCAP- prinsippet. Dette inneber at barna vert skjerma mot alle former for stress. Samtidig observerer vi kontinuerleg signal om barna si modning og dermed aukande toleranse overfor utfordringane i stell og behandling.
 
I den utstrekkinga det er mogleg, blir det gjort NIDCAP observasjonar, planar og visittar av dei for tidleg fødde barna med individuelt tilpassa anbefalingar for omsorg og miljø. Fokus for anbefalingane er åtferda til barnet, saman med kvar barnet er i utviklinga, den medisinske tilstanden, og behovet til familien. Etter kvart som barnet utviklar seg og modnast blir anbefalingane endra etter behovet til barnet. NIDCAP er familiesentrert. Målet er å styrke dykk som familie ved å hjelpe med å forstå barnet. Vi vil trygge dykk i omsorga for barnet og at de som familie skal vere ein naturleg del av omsorgsteamet.
 
Miljøet rundt barnet (lys, lyd, lukt, berøring, atmosfære) påverkar korleis barnet har det. Barnet kjem frå eit beskytta miljø inne i livmora og ut til eit miljø med mykje stimuli. Ved å tilpasse omgivnadene individuelt etter toleransen til barnet kan ein minske stress, ubehag og smerte. På den måten kan ein vere med på å støtte utviklinga til barnet og legge til rette for god kontakt mellom foreldre og barn
 
Foreldra er barna/pasientane sine viktigaste omsorgspersonar. Dei blir difor så tidleg som mogleg inkludert i pleie og stell og har tilgang til barna døgnet rundt. Nødvendige undersøkingar, til dømes ultralyd, blir tilpassa barna sin aktuelle tilstand og toleranse heller enn personalet sin tidsplan. Dette gir betra langtidsresultat enn standard pleie.
 
Et nært utsnitt av en kvinne og tvillinger. De nyfødte tvillingene har sonde og ligger hud mot hud med kvinnen under et teppe.

Foto: Helse Møre og Romsdal

Kenguru, hud-mot-hud.

Kenguru, hud-mot-hud

Tidleg hud mot hud kontakt er anbefalt for det nyfødde barnet og foreldra.  Dette er ein fin overgang frå livmora til verda utanfor. De har behov for å kjenne barnet, halde og verne det. Barnet har behov for vere tett inntil og lære dykk og kjenne.  Ein slik kroppskontakt utløyser anti-stress hormon hos barnet og foreldra. Barnet er ofte rolegare og søv djupare når det søv på brystet til foreldra.
 
Hos for tidleg fødde og sjuke nyfødde er kengurumetoden fin for å fremme nevrologisk utvikling, stabilisering og stimulering av hjartefrekvens, respirasjon, oksygenmetning og blodtrykk, lindre smerte, regulere temperatur og stimulere til kroppsleg vekst.
 
Barnet kan, sjølv om det har behov for oksygen, respirator eller CPAP, komme ut av kuvøsa så snart personalet ser det forsvarleg. Vi ønsker at dette blir gjort snarast mogleg etter fødsel.
En jente som holder en nyfødt.

Foto: Helse Møre og Romsdal

Søster på besøk.

Søsken

Å få ein nyfødt på Nyfødt intensiv kan vere ei stor omvelting for søsken. Alle søsken har behov for å bli sett og involvert. Vi oppmodar foreldre til å snakke ope med søsken om det som skjer. Før første besøk kan det vere lurt å snakke om kva som ventar og korleis avdelinga ser ut. Søsken kan henge opp teikningar og bilete på plassen til barnet. Vi har ein leikekrok ute i glassgangen og leikeområde der søsken kan leike under påsyn av foreldre. Dersom søsken treng aktivisering eller oppfølging frå førskule/skule, kan personalet hjelpe til. Avdelinga kan ordne gratis inngang til Atlanterhavsparken og Sportsparken.

Vi anbefaler å sjå Sykehusklovnene sin film om handvask på YouTube saman med storesøsken.

Det skjer at vi må stenge avdelinga for barn på besøk i vinterhalvåret på grunn av fare for infeksjonssjukdommar.

Kontakt

Telefon

Alle dagar.

Postadresse

Helse Møre og Romsdal HF Postboks 1600 6026 Ålesund

Slik finn du fram

Oppmøtestad

Nyfødt intensiv finn du ved barne- og ungdomsavdelinga, eit eige bygg på sørsida av Ålesund sjukehus. Avdelinga er open for foreldra heile døgnet. På kveld og helg kjem de inn via porttelefon – trykk B7600 og presenter dykk.

Hovudinngangen sett frå utsida.

Ålesund sjukehus

Åsehaugen 5

Finn fram

Praktisk informasjon

En kvinne som gir flaske til et nyfødt barn. En liten jente står ved siden av og holder en hånd på hodet til babyen.

Foto: Helse Møre og Romsdal.

Besteforeldre og andre nære pårørande kan oppleve glede over det nyfødte barnet blanda med bekymring når barnet er innlagt. Her er nokre tips: 

  • Tilby hjelp med søsken og praktiske gjeremål. 
  • Besøk familien om foreldra ønskjer det. 
  • Avlast foreldra ved å vere saman med barnet og eventuelt halde barnet hud mot hud. På denne måten kan foreldra ha moglegheit til å ta pausar saman. 
  • Respekter foreldra sine val, sjølv om du ikkje alltid er einig. 

Avdelinga er intensiv og pasientane treng ro og kvile. Antal besøkande må derfor vere avgrensa. Søsken og viktige nære personar er velkomne på besøk, men det er opp til foreldra om dei ønsker besøk, og av kven. Glassgangen utanfor har leikekrok og er ein fin møtestad for besøk. 

Retningslinjer for besøkande 

  • Alle må vere friske. Ingen med smittsam sjukdom, hoste eller forkjøling får kome inn.
  • Søsken frå barnehage må bytte til reine klede. 
  • Vask/sprit hendene godt når de kjem inn. 
  • Hald besøk kort og roleg inne på avdelinga. 
  • To besøkande saman med foreldra hos kvar pasient er oftast nok.
  • Avtal besøk med sjukepleiar.

Morsmjølk og den første råmjølka er spesielt viktig for sjuke nyfødde og premature barn, den er lett fordøyeleg og styrkjer immunforsvaret. Når du har fødd for tidleg, produserer du morsmjølk som inneheld næringsstoff som er spesielt tilpassa barnet ditt. Første dagane kan barnet ha behov for meir mjølk enn du kan produsere, då kan vi gi barnet ditt mjølk frå mjølkebanken. Dette er donormjølk der både givarar og mjølka er testa. 

Dersom du ønskjer å amme og har eit sjukt eller prematurt barn, treng du gjere nokre tiltak for å få i gang mjølkeproduksjonen. Det er viktig å komme tidleg i gang med å stimulere brysta. Dersom barnet ikkje kan suge på brystet i første timen, bør ein starte med handmjølking eller pumping.

Vi har håndmelkings-kit tilgjengeleg, desse inneheld litt utstyr og lenke til ein video om handmjølking. 

Du får låne pumpeutstyr i avdelinga. 

Vi hjelper til med råd og rettleiing om handmjølking, pumping, amming og flaskemating. 

Trygg informasjon om amming

Helsenorge

Ammehjelpen 

Ikkje alle ønskjer eller får til å fullamme. Morsmjølkerstatning er eit bra alternativ for barn som ikkje kan få morsmjølk.

Mating i sonde

Barna på Nyfødt intensiv er ekstra sårbare for infeksjonar. Det viktigaste tiltaket for å førebygge smitte er god handhygiene. Hendene skal vere frie for smykke og neglene korte utan neglelakk. 

Det er viktig med god handhygiene når de kjem til barnet dykkar, før du gir barnet mat, før du ammer/pumpar, etter bleieskift, etter toalettbesøk, etter at du har nyst/snytt deg, etter bruk av mobiltelefonen og kamera, og når du forlater barnet ditt. 

I tillegg er det viktig å halde orden på rommet og/eller plassen til barnet. Ikkje plasser vesker, tøy eller anna på golvet. Alt som fell i golvet, som dyner, smokkar og tøy må skiftast ut/leggast til vask. Bruk innesko i avdelinga. 

Spør personalet om utstyr som bleier, tøy og handkle ved behov.

Ta kontakt med personalet dersom de har sjukdommar som kan vere smittsame eller har vore i kontakt med andre som har hatt infeksjonssjukdommar den siste tida. 

Pasientar og besøkande kan bruke gratis trådlaust internett på sjukehuset. Sjå etter HMNGuest på mobil eller datamaskin.

Gjestenettet HMNGuest er opent tilgjengeleg, uten bruk av passord.

Legevisitten startar klokka 9 og går utover dagen. Det er ønskjeleg at de deltek og har tenkt gjennom spørsmål på førehand.

Mobiltelefon skal vere på lydlaus og desinfiserast før bruk på pasientrommet.

Det er ikkje lov å ta bilete/film av personalet eller andre pasientar utan tillating. 

For å halde kontakt med familie og venner under opphaldet på Nyfødt intensiv kan det vere nyttig å vere på nett. Vi vil likevel oppmode til å minimalisere bruken når du er saman med barnet ditt. Tidleg samspel og tilknyting mellom barn og foreldre er viktig for utviklinga til barnet. Redusert tilgjengelegheit og avbroten kontakt som følgje av skjermbruk kan skape stress hos barnet og forstyrre samspelet. De som foreldre bør vere veldig bevisste på korleis de bruker telefonen. Barna sender korte og svake signal om at dei ønsker kontakt og fangar du ikkje opp desse, mistar du ein del av det gode samspelet med barnet ditt.

Foreldre kan parkere gratis på besøksparkeringa. Sjukepleiar må få bilnummer og telefonnummer for å registrere parkeringa elektronisk. Parkeringsbevis må ligge synleg i bilen.

Ver merksam på når den utløper. Då må du be om ny registrering. Betalte parkeringsutgifter og bøter blir diverre ikkje refundert.

​Apoteket ligg på nordsida av sjukehuset, like ved  hovudinngangen.

Opningstider og kontaktinformasjon finn du på sjukehusapoteket sine sider

 

Det er kjent at snusing/røyking er spesielt ugunstig for foreldre til for tidleg fødde og sjuke nyfødde barn. Snusing/røyking når du ammar gir dårlegare mjølk, ofte mindre mjølkemengd, og kan utsette barnet for sjukdommar. 

Klarer du ikkje å slutte, er det svært viktig å redusere snusinga/røykinga til eit minimum, og tilpasse tidspunktet i forhold til amming og pumping.  

Ved passiv røyking blir også nikotin og andre stoffar overført i mjølka. Andre må ta omsyn! 

Det er ikkje tilrådd med samsoving når nokon av foreldra røyker eller snusar. Unngå snusing/ røyking ei god stund før du har planlagt ei kosestund med barnet ditt. Tenk på at lukta vil sitte lenge både på hendene og i kleda.

Kafé

Vi har god heimelaga mat, varme og kalde rettar, til gode prisar.​

Du finn oss​ i 1. etasje, fløy M. Velkomen!

Opningstider:
  • Måndag til fredag: kl 09.00 - 15.00
  • Helg og høgtid: stengt

Kios​k

I tillegg har vi kiosk i hovedvestibylen ved sjukehuset. 
Opningstider:
  • Måndag til fredag: kl 07.00 - 20.00
  • Laurdag og søndag: 12.00 - 18.00
  • Raude dagar: 10.00 - 18.00

Foreldre har rett til all informasjon om sitt barn. Personalet har teieplikt og kan ikkje svare på spørsmål om andre barn. Vi kan heller ikkje svare på telefonar frå familie og venner utan samtykke frå foreldra.

Nokre familiar deler rom, så det er viktig å respektere kvarandre sine behov for privatliv.

Vi ønsker også å informere om at personalet ikkje kan takke ja til venneførespurnader frå foreldre på sosiale medier.

Alderen til barnet ved utskriving er individuell, og i nokre få tilfelle kan det vere behov for tilpassingar i heimen. Mange får tilbod om å reise heim med oppfølging frå Digitalt heimesjukehus. De får nødvendig opplæring dersom dette gjeld for dykk. 

Før heimreise blir barnet undersøkt grundig av lege. Lege og sjukepleiar gir informasjon og svarer på spørsmål.

Opplæringsvideoar for foreldre ved Nyfødt intensiv

Eit supplement til den opplæringa ein gir på sjukehuset.