DMS i Kristiansund skal bli eit nasjonalt utstillingsvindauge
- Vi ønskjer å utvikle eit DMS som skal få ei særstilling i Norge når det gjeld fagleg bredde, kompetanse, forsking og utvikling, det seier Kjell Neergaard, ordførar i Kristiansund og leiar for styringsgruppa som er sett ned for å utvikle det distriktsmedisinske senteret i Kristiansund.
![](/4a7ebd/contentassets/9d007fb4e3e541d4bd9cd877dc7a16e6/nytt-inngangsparti-kristiansund.jpg?format=webp&width=900&height=600&quality=80)
Om prosjektet
Før jul blei det kjent at Helse Møre og Romsdal, Kristiansund kommune, ORKidé og Helseinnovasjonssenteret i Kristiansund startar eit felles prosjekt for å utvikle DMS-innhaldet. I dag, fredag 19.januar var styringsgruppa samla i Kristiansund og blei einige om mandat, samt innhaldet for ei stilling som prosjektleiar.
![En gruppe mennesker som poserer for et bilde](/4a7ec0/contentassets/9d007fb4e3e541d4bd9cd877dc7a16e6/styringsgruppa-dms.jpg?width=4032&height=2688&quality=80&format=webp)
- Vi i Helse Møre og Romsdal er svært glade for endeleg å komme i gang med prosjektet. Det er nå viktig å leggje til rette for vidareføring og utvikling av spesialisthelsetenester, kommunale tenester, helseinnovasjon og andre utviklingsaktørar som ønskjer seg inn i framtidas DMS, seier administrerande direktør i HMR, Espen Remme.
Vil utforske og utnytte moglegheitsrommet
Delar av DMS-arbeidet inngår som ein del av prosjektet med å utvikle Sjukehuset Nordmøre og Romsdal. I tillegg legg sjukehusbygget til rette for å utvikle nytt innhald.
- Det meste er opp til oss sjølv og vår eiga vilje til å leggje kjente og ukjente tenester inn i senteret, seier Neergaard som får støtte av Remme.
- For å lukkast med å gje pasientane våre eit best mogleg tilbod så må Helse Møre og Romsdal og kommunane gå hand i hand og samarbeide tett. Eg ønskjer at vi i framtida tenkjer heilskap og utviklar helsetenestene våre på ein måte som legg vekt på gode pasientforløp, omstilling og innovasjon, avsluttar Remme.