Styreleiar på besøk 24 timar etter oppnemninga
Ny styreleiar i Helse Møre og Romsdal, Ingve Theodorsen, kom til sjukehusa i Molde og Kristiansund kort tid etter at han formelt blei oppnemd måndag 5. mars.
![En gruppe mennesker som står på en strand](/4a7e59/contentassets/99cb4ba4eb754e6ab30634de42a07498/hjelset3.jpg?format=webp&width=900&height=600&quality=80)
I samband med statsminister Erna Solberg sitt besøk i Kristiansund tysdag 6. mars, opna det ein moglegheit for at ein relativt ny styreleiar i Helse Midt-Norge, Tina Steinsvik Sund (januar -18) og ein nyoppnemd styreleiar i HMR kunne få møte tilsette og leiarar ved dei to sjukehusa same dag. Med seg hadde dei også adm.dir. i Helse Midt-Norge, Stig Slørdahl og Espen Remme, adm.dir. i HMR.
Frå akuttmottak til poliklinikk
Besøket starta i akuttmottaket ved Molde sjukehus der seksjonsleiar Petter Rangnes var vertskap saman med sjukhuskoordinator Anita Kvendseth. Rangnes fortalde om akuttforløpet og triagering (system for å prioritere pasientar) i mottaket. Styreleiarane fekk også orientering om korleis miljøa i Molde og Kristiansund arbeider i grupper for å førebu ein best mogleg pasientflyt i akuttmottaket i det nye sjukhuset på Hjelset.
![Styreleiar saman med adm.dir., sjukehuskoordinator og seksjonsleiar for akuttmottaket ved Molde sjukehus](/4a7e59/contentassets/99cb4ba4eb754e6ab30634de42a07498/akuttmottak-molde.jpg?width=2016&height=1344&quality=80&format=webp)
I intensivavdelinga fortalde seksjonsleiar Gry Rønning korleis ein med å samle dei dårlegaste pasientane har fått ei betre løysing for pasientar og tilsette. Ho var også innom det pågåande arbeidet med å rekruttere sårt tiltrengte anestesi-, intensiv- og operasjonssjukepleiarar. Seksjonsleiar for anestesilegane i Molde, Georg Johnsen, har sjølv nettopp kome tilbake etter å ha fullført spesialistutdanninga ved St.Olav Hospital og delte nokre av sine erfaringar med å vere i utdanning i mindre og større sjukehus. Styreleiarane fekk også høyre at helseføretaket tar imot eit stort tal turnuslegar (Legar i spesialisering 1).
![Besøket blir tatt godt imot ved intensivseksjonen](/4a7e59/contentassets/99cb4ba4eb754e6ab30634de42a07498/intensiv-molde.jpg?width=1512&height=1008&quality=80&format=webp)
På seksjon for augesjukdomar blei dei tatt imot av seksjonsleiar Gry Unjem, avdelingssjef Ingrid Vasdal og seksjonsoverlege Erik Holen. Tematikk var rekruttering, jobbgliding, medisinsk teknisk utstyr og arbeidet fram mot SNR.
![Diskusjon rundt bordet på augepoliklinikken i Molde.](/4a7e59/contentassets/99cb4ba4eb754e6ab30634de42a07498/augepoliklinikk2.jpg?width=1024&height=682&quality=80&format=webp)
På veg til Kristiansund blei det ein stopp på tomta på Hjelset for å vise korleis det nye sjukehuset er plassert i området.
![På tomta på Hjelset viste adm.dir. Espen Remme kvar sjukehuset skal ligge på tomta.](/4a7e5a/contentassets/99cb4ba4eb754e6ab30634de42a07498/pa-hjelset.jpg?width=1512&height=1008&quality=80&format=webp)
Ortopedi, kreftpoliklinikk og pusterom
Saman med overlege Kirsti Sevaldsen, orienterte overlege Øystein Lian om aktivitet og status for fagområdet i Kristiansund sjukehus. Dei var også innom nokre av områda som ein forskar på i fagmiljøet i dag, og arbeidet for å utforme tilbodet i DMS Kristiansund.
![Overlege Øystein Lian orienterer om aktivitet og status for fagområdet ortopedi ved Kristiansund sjukehus.](/4a7e5a/contentassets/99cb4ba4eb754e6ab30634de42a07498/ortopedi.jpg?width=1512&height=1008&quality=80&format=webp)
På kreftpoliklinikken tok kreftsjukepleiar Laila Andersen dei med på ei omvisning i lokala, og fortalde om utviklinga i cellegiftbehandlinga og det gode samarbeidet poliklinikken har med sengeposten og med kommunane for å utvikle tenestetilbodet og legge til rette for god behandling.
![Kreftsjukepleiar Laila Andersen var vertskap ved kreftpoliklinikken i Kristiansund.](/4a7e5b/contentassets/99cb4ba4eb754e6ab30634de42a07498/kreftpoliklinikk-krsund1.jpg?width=2016&height=1344&quality=80&format=webp)
Siste post denne dagen var Pusterommet, eit treningstilbod for kreftpasientar, og som var opna i februar i fjor. Fysioterapeut Andreas Andrev var midt i ei fellestrening for pasientane, men tok eit avbrekk for å gi ei kort omvisning og fortelle om tilbod og treningsmoglegheiter.
![Andreas Andrev viste rundt i Pusterommet i Kristiansund.](/4a7e5b/contentassets/99cb4ba4eb754e6ab30634de42a07498/pusterommet.jpg?width=2016&height=1344&quality=80&format=webp)
I begge sjukehusa var det sett av tid til eit uformelt møte med tillitsvalte og leiarar som hadde tid og moglegheit til å møte dei nye styreleiarane og stille spørsmål og diskutere saker dei er opptekne av.
Nyttig dag
- Det er viktig å komme ut, møte menneska og bli kjent, sa styreleiar i HMR Ingve Theodorsen.
Han opplevde besøka i Molde og Kristiansund som veldig nyttige, og ser fram til å besøke sjukehusa i Ålesund og Volda. Den nye styreleiaren har også ønskje om å legge fleire av styremøta ut til institusjonane slik at styret får vere i miljøa der tenestene blir levert.
- Det var interessant å høyre om forbetringarbeidet i helseføretaket, og korleis ein samarbeider for å førebu seg fram mot SNR, sa styreleiar i Helse Midt-Norge Tina Steinsvik Sund.
I løpet av april vil dei to nye styreleiarane besøke sjukehusa i Ålesund og Volda.