Starter bygginga av Vardesenteret Møre og Romsdal
I januar 2024 blir det byggestart for Vardesenteret Møre og Romsdal ved Ålesund sjukehus. Senteret skal bli ein fylkesdekkande møteplass kor kreftpasientar og pårørande får hjelp og rettleiing til å kome seg gjennom kreftbehandling eller leve med ein kreftsjukdom.
Vardesenteret Møre og Romsdal er eit topartssamarbeid mellom Kreftforeningen og Helse Møre og Romsdal, og skal byggast på parkeringsplassen mellom Kreftavdelinga og Åse hotell.
- Å få Vardesenteret på plass vil bidra til å gi kreftpasientane i fylket eit heilhetleg tilbod, også utover den medisinske behandlinga. Ved bruk av digital løysingar skal informasjon og undervisning overførast til dei andre sjukehusa i Møre og Romsdal, seier klinikksjef kreft og rehabilitering Siri Beate Talseth-Frilund i Helse Møre og Romsdal.
- Veldig glad for at spaden no blir sett i jorda! Vi ser fram til at vi saman skal fylle senteret med både fysiske og digitale rehabiliterings- og mestringstilbod for pasientar og pårørande gjennom heile pasientforløpet, seier distriktsleiar Tom Anders Stenbro i Kreftforeningen.
Vardesenteret skal bli eit lavterskeltilbod først og fremst til kreftramma, pårørande og etterlatte. Helse Møre og Romsdal og Kreftforeningen vil også å bruke senteret til kompetanseheving på alle nivå i helsetenesta, samt for pasientar og pårørande. Dessutan er det planlagt å flytte etablerte og nye forskingsaktivitetar inn i Vardesenteret.
- Seineffektpoliklinikken ble starta med første pasient i desember 2022 i Ålesund. Vardesenteret vil også innehalde denne seineeffektpoliklinikken, samt undervisningsrom og rom for sosiale treffpunkt, seier overlege onkologi Jo-Åsmund Lund.
Det er Slyngstad Aamlid arkitekter som har tegna bygget. Det er lagt vekt på å skape eit bygg utan korridorar med mykje lys og luft. Det er entreprenøren Ålesund Bygg som har fått oppdraget med å bygge Vardesenteret som er planlagt ferdigstilt hausten 2024.