Blir konstituert som klinikksjef i Ålesund
Øyvind Nytun tek over som klinikksjef for Ålesund sjukehus, og vil i ei periode framover ha ansvaret for både Ålesund sjukehus og Volda sjukehus.
Administrerande direktør Olav Lødemel har konstituert Øyvind Nytun som klinikksjef for Klinikk Ålesund sjukehus frå 9. februar 2026 og ut august.
– Det er viktig å få på plass ny leiing så raskt som råd, og eg er glad for at Øyvind Nytun har takka ja til oppdraget, etter at eg blei samd med førre klinikksjefen om at ho skulle gå ut av rolla, seier adm.dir Olav Lødemel.
Førre klinikksjef, Elisabeth Siebke, gjekk av som klinikksjef for halvanna veke sidan.
Sikre stabilitet og kontinuitet
Øyvind Nytun har tidlegare vore ein del av leiargruppa ved Ålesund sjukehus i rolla som assisterande klinikksjef.
– I den krevjande situasjonen heile føretaket står i, er det viktigaste no å sikre stabilitet og kontinuitet i leiinga. Med si erfaring har Øyvind god innsikt i drifta ved begge sjukehusa, og han kjenner godt til prosessane som allereie er i gang i Ålesund. Eg er trygg på at han vil leie sjukehuset vidare på ein ryddig og ansvarleg måte, og bidra til å gjennomføre den planlagde omstillinga slik at drifta gradvis kan bringast nærare dei økonomiske rammene, seier Lødemel.
Nytun er utdanna gynekolog og har lang fartstid frå St. Olavs hospital samt lang leiarerfaring frå Helse Møre og Romsdal.
– Eg tek på meg dette oppdraget fordi eg meiner det er nødvendig å finne løysingar innanfor dei rammene vi har. Det må gjerast på ein fagleg forsvarleg måte, og eg ser fram til å finne løysingane i tett dialog med dyktige leiarar og fagfolk ved Ålesund sjukehus, seier Øyvind Nytun.
Assisterande klinikksjef i Volda
Siv Jensen vil gå inn som assisterande klinikksjef ved Volda sjukehus. Jensen har brei klinisk bakgrunn, er utdanna intensivsjukepleiar og har lang leiarerfaring.
– I ei mellombels periode er det viktig å sikre at vi har ein dyktig stadleg leiar som kan sikre kontinuitet i dei prosessane vi har iverksett ved sjukehuset i Volda. Jensen har jobba tett med meg heile vegen, ho vil få god støtte frå tilsette, tillitsvalde, verneteneste og leiargruppa i Volda, seier Nytun.
Stillinga vil bli lyst ut, men det er førebels planlagt at Nytun og Jensen vil ha rolla ut august.