Ny infrastruktur for forsking og utdanning

Simuleringslaben på Hjelset er ein viktig del av HMR si satsing på moderne og praktisk retta kompetanseutvikling. Gjennom VirtSim, som organiserer simuleringsaktiviteten i føretaket, får helsepersonell høve til å trene på realistiske pasientsituasjonar i trygge og autentiske omgjevnader – frå grunnleggande ferdigheitstrening til avansert fullskalasimulering. Dette gir eit sikkert læringsmiljø der ein kan øve på både medisinske prosedyrar og tverrfagleg samarbeid, utan risiko for pasientane.

Areal til simulering og ferdighetstrening 

I 2025 fekk Helse Møre og Romsdal på plass fysiske simuleringsareal ved alle sjukehus i føretaket. Med etablering av simuleringsareal ved Sykehuset Nordmøre og Romsdal (SNR) – som det siste i føretaket – er det no eit samla og likeverdig tilbod innan simulering, ferdigheitstrening og kompetanseutvikling ved SNR, Kløvertun i Volda og Kunnskapssenteret i 6. etasje i Ålesund.

Simuleringsareala er utvikla i regi av VirtSim og bygde etter same prinsipp, med felles metodikk og utstyr. Dette gjer det mogleg for tilsette å delta i simulering og opplæring på tvers av lokasjonar, og styrkjer både samhandling, kompetansedeling og pasienttryggleik i heile føretaket.

Styrkar forskingsmiljøet og kompetansen i regionen

Forskingsposten opna 13. mai,  har eit godt rusta laboratorium, og eit nært samarbeid med avdeling for biokjemi, mikrobiologi og patologi i heile fylket. Her blir pasientane møtt av sjukepleiarar, bioingeniørar og legar.

Forsking er ein viktig del av spesialisthelsetenesta. Den nye forskingsposten vil gi legar som også er forskarar høve til å gjennomføre forsking med eigna ressursar. Dette vil generere aktivitet som styrkar forskingsmiljøet og kompetansen i regionen.

Klinisk pasientnær forsking

Forskingsposten vil prioritere klinisk pasientnær forsking, i form av oppdrags- og bidragsstudiar. Aktiviteten vil bli bygd opp etter modellen i Ålesund, som har vist seg å gi gode resultat for både legar og pasientar. Personalet har allereie studiar dei skal starte med, og kompetanseutviklinga vil skje gradvis.

Avtale med Inven2

Inven2 og Helse Møre og Romsdal har inngått eit samarbeid som skal styrke gjennomføring av kliniske studiar ved helseføretaket. Frå 15. oktober 2025 har Inven2 fått ansvaret for kontraktshandtering og økonomioppfølging av kliniske studiar med kommersielle aktørar ved HMR. Samarbeidet er ein del av den langsiktige satsinga på kliniske studiar. 

– Å inngå avtale med Inven2 gjer HMR enno meir robust i handteringa av nye oppdragsstudiar, særskilt i planfasen. Det viser HMR sitt kontinuerlege fokus og engasjement for å legge til rette for ein profesjonell og prioritert handtering av det viktige tilbodet for kliniske behandlingsstudiar, samt legg til rette for behandlande lege og pasient, seier seksjonsoverlege for kliniske studiar Dag Arne Lihaug Hoff om avtalen.

 

Tilbake til Årsmelding for forsking og utdanning 2025