Du blir på overvakingsavdelinga så lenge det er behov for det. Deretter vil du få tilbod som mat og drikke, og informasjon frå sjukepleiar og kirurg før heimreise. Dersom det er aktuelt vil du få med deg sjukmelding, e-resept og/eller smertestillande medisinar. For beskriving av operasjonen og eventuell kontrolltime, sjå helsenorge.no.
Når du har kome heim
Smerter
Etter operasjonen er det normalt å ha smerter. Dei første dagane etter operasjonen skal du ta smertestillande jamleg og til faste tider. Av og til vil du trenge å kombinere ulike smertestillande preparat. Nedtrapping blir etter kvart gjord som smertene minkar. Sørg for å ha paracetamol heime etter operasjonen.
Aktivitet
Sitt eller ligg for det meste med beinet høgt (i hjartehøgd) dei første dagane og nokre gonger for dagen dei neste vekene. Dette hindrar hevelse, bløding og lindrar smerte.
Du skal bruke krykker og ikkje belaste dei første seks vekene. Auk aktiviteten gradvis. Hald foten høgt når du er i kvile og bygg opp med puter under beinet om natta.
Du får walkerortose etter seks veker, denne kan du ta av og på. Dette vil du eventuelt få informasjon og instruksjon om, etter operasjonen.
Sting
Det blir brukt sting som blir løyste opp av seg sjølv, eller som skal fjernast hos fastlegen din 14 dagar etter operasjonen. Dette vil du få beskjed om.
Dusj
Du kan dusje etter operasjonen, men må dekkje til den opererte foten slik at gipsen/bandasjen ikkje blir våt.
Du kan eventuelt bruke gips-/dusjpose som kan kjøpast på apoteket.
Gips
Dersom gipsen på foten blir gjennomtrukken med blod må du ta kontakt med sjukehuset.
Dei første dagane etter operasjonen kan det opererte beinet hovne opp og føre til at gipsen blir for stram.
Observasjonar ved fotoperasjon
Du må sjekke at tærne er godt sirkulerte, det vil seie at dei ikkje blir misfarga (blå eller grå), nomne, kalde eller bleike.
Tiltak
Dersom det ikkje hjelper å halde det opererte området høgt, ta kontakt med sjukehuset.
Køyre bil
Når du kan byrje å køyre bil er avhengig av smerte og funksjon. Du kan heller ikkje køyre bil når du er påverka av medisinar og har redusert reaksjonsevne. Trafikktryggleiken er ditt ansvar.
Sjukmelding
Sjukmeldingsperioden vil variere utor arbeidssituasjon og din individuelle situasjon. Eventuell forlenging av sjukmelding blir gjord hos fastlege.
Oppfølging
Etter to veker skal du møte til kontroll på sjukehuset, då skal du fjerne sting og byte gips. Somme inngrep medfører fleire kontrollar, dette vil du få beskjed om.
Feber
Dei første dagane etter operasjonen kan du få ei lett temperaturstiging. Dette er normalt, men ta kontakt med sjukehuset dersom du har vedvarande feber over 38–38,5 grader celcius etter operasjonen.
