Toppleiinga i Helse Møre og Romsdal og kommunane tek plass i Strategisk samarbeidsutval
Frå 1. oktober har Strategisk samarbeidsutval (SSU) fått ny samansetjing. Toppleiinga i kommunane i fylket og Helse Møre og Romsdal erstattar den tidlegare representasjonen frå dei lokale samarbeidsutvala. Målet er å styrke SSU si rolle som strategisk arena for å drøfte og følgje opp felles utviklings- og endringsbehov i helse- og omsorgstenestene.
Strategisk samarbeidsutval
I tråd med nasjonale prinsipp for organisering av Helsefellesskap etablerte Helse Møre og Romsdal og kommunane i fylket hausten 2021 eit Strategisk samarbeidsutval (SSU). Utvalet erstatta tidlegare Overordna samarbeidsutval og skal i tråd med samarbeidsavtalen behandle saker om utvikling og samarbeid innan helse- og omsorgstenester som gjeld heile fylket. Utvalet rapporterer til Partnarskapsmøte og kan gi oppdrag til faglege og lokale samarbeidsutval.
I perioden 2021 til 1. oktober i år, har SSU vore representert med leiarar og nestleiarar for dei lokale samarbeidsutvala i Møre og Romsdal. Hensikta har vore å sikre gjennomgåande representasjon frå dei lokale utvala (LSU) til SSU. I tillegg inngår brukarrepresentantar og leiar av samarbeidsordning for spesialisthelsetenesta og fastlegane (samhandlingsoverlege) som medlemmar. Statsforvaltaren, Pasient- og brukarombodet og Helse Midt-Norge deltek i SSU som observatørar.
Meir forpliktande samarbeid
Ei arbeidsgruppe som vart nedsett hausten 2025 for å tilrå mål og strategi for Helsefellesskap Møre og Romsdal, peika i sak 15/26, behandla av SSU 18. mars, på behovet for at toppleiinga i Helse Møre og Romsdal og kommunane er representert i SSU. Dette vart vurdert som ein føresetnad for at SSU skal kunne definere og operasjonalisere forpliktande mål og strategiar for framtidas helsetenester i fellesskap. Ein konsekvens av manglande representasjon frå toppleiing i SSU, er at viktige saker har blitt handtert utanfor helsefellesskapet.
Tilrådinga om å justere representasjonen i SSU vart følgd opp i sak 6/2026 i Partnarskapsmøtet 7. mai. Der vart det gjort vedtak om å endre samansetjinga i SSU slik at dei to øvste leiarnivåa i Helse Møre og Romsdal og kommunane blir representert i utvalet. Endringa vart forankra i samarbeidsavtalen og sett i verk 1. oktober 2026.
Det nye SSU vart konstituert 6. oktober. Per Sverre Ersvik, kommunedirektør i Averøy kommune, vart valt til leiar. Erik Ganesh Iyer Søegaard, fagdirektør i Helse Møre og Romsdal, vart valt som nestleiar. Informasjon om dei øvrige medlemmane, møteplan og saker kan lesast her.
Takka tidlegare SSU for innsatsen
I SSU-møtet 16. september på Vestnes Fjordhotell vart tidlegare leiar i SSU, Jørn-Åge Longva, avdelingssjef for medisin ved Klinikk Ålesund sjukehus, og nestleiar Lene Bjørlo Overå, kommunalsjef og assisterande kommunedirektør i Giske kommune, takka for engasjementet og innsatsen dei har lagt ned i utvalet.
Dei ønskte det nye SSU lukke til i arbeidet med å vidareføre og utvikle satsingar og samarbeidstiltak på strategisk nivå.
Leiarane og nestleiarane i dei lokale samarbeidsutvala vil vidareføre dette arbeidet gjennom samarbeid og utvikling mellom sjukehusa og kommunane i opptaksområda deira.
Samhandlingskoordinator Oddvar Marøy, som har vore medlem i Felles samarbeidssekretariat sidan 2022, går no av med pensjon. Han vart også takka for innsatsen han har lagt ned gjennom fleire år i Helsefellesskap Møre og Romsdal. Frå 1. november 2026 tek Vegar Batts over rolla som samhandlingskoordinator for Søre Sunnmøre.
