Lærerikt og nyttig: NTNU lærar tilbake i klinikken for ein dag
Når utdanning og klinikk møtest, blir undervisninga både meir relevant og tettare knytt til praksis. Ei kort hospitering ved intensivavdelinga i Ålesund vil styrke samanhengen mellom utdanning og klinisk arbeid.
Når utdanning og klinikk møtest, blir intensivsjukepleiefaget styrkt. Det var også bakgrunnen for at Elise Kvalsund Bårdsgjerde, førsteamanuensis ved NTNU og tilsett ved Institutt for helsevitenskap i Ålesund, valde å hospitere ein dag på intensivavdelinga ved Ålesund sjukehus.
Elise er studieprogramleiar for master i spesialsykepleie innan anestesi-, intensiv- og operasjonssjukepleiar, ho er òg aktiv innan forsking og utvikling, og har vore sentral i arbeidet med å etablere Klinisk utdanningseining ved intensivavdelinga i Ålesund.
Kva er KLUe?
KLUe – Klinisk utdanningsenhet ved intensiv – er ei samarbeidsordning mellom NTNU og intensivavdelinga i Ålesund. Målet er å knyte utdanning og klinikk tettare saman gjennom praksisnær undervisning, fagutvikling og gjensidig kompetansedeling.
KLUe legg til rette for hospitering begge vegar:
- lærarar som besøker klinikken
- klinikarar som besøker campus
-Ønskte innblikk i studentane sin praksiskvardag
Elise fortel at ho ønskte å hospitere for å få endå betre innsikt i den kliniske kvardagen studentane møter. Elise er sjølv utdanna intensivsjukepleiar, men har jobba med undervisning sidan 2014.
– Det kjendes mindre framandt enn eg hadde trudd etter så mange år borte frå klinikken. Alt i alt blei det ein lærerik og nyttig dag. Det er alltid lærerikt å vere tett på praksisfeltet. Det gir ei heilt anna forståing av kompleksiteten i intensivsjukepleiarens arbeidskvardag, seier Elise.
Betydning for undervisninga
Sjølv om hospiteringa berre varte ein dag, meiner Elise at erfaringa vil påverke undervisninga hennar.
– Eg fekk ei stadfesting på kva kunnskap som er viktig å formidle til studentane, og ei nyttig oppfrisking i både medikament og utstyr. Det gjer undervisninga meir praksisnær og relevant.
Samhandling mellom utdanning og klinikk
Elise meiner slike møtepunkt er avgjerande for kvaliteten i utdanninga.
– Vi blir betre kjende med kvarandre, og terskelen for samarbeid blir lågare. Når lærarar hospiterer, får studentane eit meir oppdatert og praksisnært undervisningsoppegg.
Rekruttering og relevans
Elise trur at hospitering kan bidra positivt til rekruttering til intensivsjukepleie.
– Synlegheit betyr mykje. Eit tett samarbeid mellom utdanning og praksisfelt styrkjer relevansen i utdanninga og kan gjere faget meir attraktivt.
– Hospiteringa ha gitt meg fagleg påfyll, større tryggleik i lærarrolla og eit tettare samarbeid med eit svært kompetent praksisfelt. Og det hadde vore flott om nokon frå klinikken òg ville hospitere hos oss på campus ein dag.
Styrker utdanning gjennom nærleik til klinisk kvardag
Ragnhild Jacobsen Korshamn, leiar av KLUe, er opptatt av å bygge sterke band mellom utdanning og klinisk praksis. Ho understrekar betydningen av å skape gode møtepunkt der kunnskap, utdanning og praksis kan utviklast i fellesskap.
– Vi ønsker at vi saman bygger bru mellom kunnskap, utdanning og klinisk praksis, seier Korshamn.
Gjennom ordningar som hospitering får utdanningsmiljøa verdfull og oppdatert innsikt i den kliniske kvardagen. Dette bidrar til at undervisninga blir tettare kobla til den røynda studentane møter som intensivsjukepleiarar. Samtidig styrker slike møtepunkt samarbeidet mellom utdanning og klinikk.
– Vi får betre innsikt i roller, behov og utfordringer – og saman kan vi utvikle både utdanning og praksis videre, seier ho.