Digital sårbehandling

Digital sårbehandling er eit tilbod til polikliniske sårpasientar som ikkje er på sjukehus. Sårbehandlinga blir utført av sjukepleiar i kommunen. Helsepersonell er utstyrt med kamera, som har direkte videooverføring til rettleiar/sjukepleiar på sjukehus.

Langvarig behandling

Sårpasientar har ofte behov for langvarig behandling med hjelp frå sjukehus og kommune. Mange av pasientane har nedsett funksjonsevne, og fleire har i periodar opphald på helsehus eller sjukeheimar, eller heimetenesta i kommunen sin. For desse pasientane kan det vere ein fordel å sleppe reisa til sjukehus, og heller få utført sårkontroll med videokonsultasjon der dei er.

Vekslinga mellom videokonsultasjonar og fysisk oppmøte på poliklinikk vil avhenge av utviklinga av såret og behov for fleire undersøkingar.

Videokonsultasjonar blir oppretta som ein avtale på same måte som ein oppmøteavtale på poliklinikk.

Sjukepleiar i heimetenesta bruker eit kamera som er retta mot såret. Legen på sjukehuset ser såret på ein pc-skjerm samtidig som pasienten får sårstell heime. Den som deltar i videokonsultasjonen, vil gjere dei same observasjonane som om pasienten skulle hatt kontrollen på sjukehuset.

Dersom det under videokonsultasjonen blir vurdert behov for kontroll med oppmøte på sjukehuset, vil pasienten få tilbod om dette.

Etter sårskift vil vidare plan og oppfølging avklarast i samarbeid med pasienten.

Sårbehandlinga blir dokumentert i pasientjournal på sjukehuset. Denne dokumentasjonen blir send digitalt til helsetenesta i kommunen. Det vil ikkje bli lagra opptak eller bilde frå videokonsultasjonen.

Vidare oppfølging vil følge vanleg rutine med hjelp av for eksempel heimesjukepleie og sårkontrollar på sjukehuset.