Palliativt team Ålesund

Palliativ (lindrande) behandling er definert som aktiv behandling, pleie og omsorg for pasientar som har ein sjukdom ein ikkje blir frisk av. Palliativt team ønsker å legge til rette for at pasienten får vere mest mogleg heime, eller så nær heimen som mogleg. 

Vi vil samarbeide om god organisering av tenester som den enkelte pasient og pårørande har behov for. Vi arbeider for å styrke fagkunnskap hos helsepersonell gjennom rådgiving og undervisning. Teamet er eit bindeledd mellom sjukehuset og kommunane.

Kven kan følgast opp av palliativt team?

Palliativt team tilbyr eigne konsultasjonar for pasientar med: 

• Kreft
• KOLS
• Lungefibrose
• Hjartesvikt
• Nyresvikt
• ALS
• Parkinson

Teamet kan gi råd til helsepersonell uavhengig av diagnose, men eigne konsultasjonar blir berre gitt til diagnosegruppene over. 

Palliativ eining - sengeplasser

Palliativ eining disponerer senger på kreftavdelinga ved Ålesund sjukehus. Desse sengene er for pasientar med kreftsjukdom. Pasientar med andre diagnosar får oppfølging poliklinisk eller via tilsyn frå palliativt team på andre avdelingar. 

Målet med lindrande behandling

• Pasient og pårørande opplever best mogeleg livskvalitet.
• Pasient og pårørande er ivaretatt både på sjukehus og i kommunen.

Dette kan ein oppnå ved å:

• Forebygge og lindre fysiske, psykiske, sosiale og åndelege/ eksistensielle utfordringar.  
• Gi støtte til pasient og pårørande.
• Gi tverrfagleg tilnærming.
• Spreie kompetanse om lindrande behandling og pleie.
• Legge til rette for at pasienten kan vere heime så lenge som muleg.
• Samarbeide nært med primærhelsetenesten.

Kva kan vi tilby?

• Polikliniske konsultasjonar.
• Vurderingsbesøk heime eller på sjukeheim/sjukehusavdelingar saman med ansvarleg lege/sjukepleiar.
• Hjelp til koordinering og tilrettelegging ved utskriving frå sjukehus.
• Rådgjeving, rettleiing og undervising til helsepersonell.
• Nært samarbeid med kreftkoordinatorane i kommuna.
• Vi planlegg oppfølginga di ut i frå korleis vi forventar at sjukdommen din vil utvikle seg. 
• I periodar der sjukdommen og symptoma endrar seg mykje vil det kanskje vere nødvendig med tettare og meir regelmessig oppfølging. 

Kven er lindrande (palliativt) team?

• Ei tverrfagleg samansett gruppe som kan gi råd og rettleiing innan lindrande behandling.
• Når pasienten er heime blir han følgt opp av fastlege. Er pasienten på sjukeheim er det tilsynslegen som har ansvaret.

Kompetansen teamet har tilgang på

• Lege med spesialkompetanse i anestesi, smertebehandling, kreftbehandling og lindrande behandling
• Sjukepleiar med vidareutdanning i kreftsjukepleie og palliasjon
• Fysioterapeut
• Sosionom
• Prest
• Ernæringsfysiolog
• Ergoterapeut  

Få oversikt over tilbodet i din kommune