Årsmelding 2023: Forsking, innovasjon, utdanning og kompetanse

Utdanningssjef Guro Berge, konstituert forskingssjef Vibeke Devold Valderhaug og seksjonssjef for Seksjon for kliniske studiar Dag Arne Lihaug Hoff deler tankar og refleksjonar rundt året 2023.

I april 2023 vart Seksjon for kliniske studiar etablert. Seksjonen rettar seg mot kliniske studiar tilknytta Helse Møre og Romsdal. Eit av hovdufokusa er å leggje til rette for at fleire pasientar kan delta i slike studiar.

Kliniske studiar, også kjent som utprøvande behandling, er undersøkingar utførte på menneske for å granske verknaden av ulike behandlingsmetodar. Dette inkluderer trenings- og rehabiliteringsprogram, nye legemiddel, eller bruken/utviklinga av medisinsk utstyr.

Helse Møre og Romsdal deltar for fyrste gong i Forskningsrådet si nasjonal fagevaluering av medisin og helsefag (EVALMEDHELSE). Hovudmålet med fagevalueringa er å vurdere kvalitet, relevans og rammevilkår for forsking innan medisin og helsefag i Noreg. Evalueringa skal resultere i anbefalingar til institusjonane som deltar i evalueringa, til Forskningsrådet og til departementa.

Overlege i ortopedi Tommy Frøseth Aae og psykologspesialist Kristen Hagen blei i 2023 utnemnt til Helse Møre og Romsdals første forskingsgruppeleiarar.

Aae leiar OrtoForsk-KSU, der gruppa skal forske på ulike aspekt ved artrose.

Hagen leiar Forskingsgruppa for angst og tvangsliding i Helse Møre og Romsdal, som fokuserer på angst, tvangslidingar og andre relaterte område.